2024 jyly áleýmettik mindettemelerdi Úkimet tolyqtaı oryndady – Qarjy mınıstri
ASTANA. KAZINFORM – Bazalyq zeınetaqy mólsherin kezeń-kezeńimen arttyrý jalǵasyp jatyr. Bul týraly Májilistiń jalpy otyrysynda 2024 jylǵy respýblıkalyq bıýdjettiń atqarylýy týraly Úkimet esebin talqylaý kezinde QR Qarjy mınıstri Mádı Takıev aıtty.
— Fıskaldyq-bıýdjettik problemalarǵa qaramastan, jalpy jyl qorytyndysy oń serpinmen atap ótildi. Jedel derekter boıynsha, jalpy ishki ónimniń naqty ósýi 4,8% qurady. Bıýdjet túsimderi 98% oryndalyp, shamamen 20 trln teńge tústi. Shyǵystar 23 trln 594 mlrd teńgege atqaryldy. Bıýdjet tapshylyǵy belgilengen shamadan 3 trln 649 mlrd teńgege nemese jalpy ishki ónimge shaqqanda 2,7 paıyzdy qurady. Inflıatsııa deńgeıi 2023 jylmen salystyrǵanda 9,8 paıyzdan 8,6 paıyzǵa deıin tómendedi. Jalpy, barlyq áleýmettik mindettemelerdi Úkimet tolyqtaı oryndady, onyń ishinde atap ótsek, óńirlerdi qoldaýǵa 7,1 trln teńge, áleýmettik salaǵa 8,8 trln teńge qarajat bólindi, — dedi M. Takıev.
Onyń aıtýynsha, byltyr Úkimet rezervinen óńirlerdegi aýqymdy máselelerge de bıýdjettik qarajattar jumsaldy. Atap aıtsaq, sý tasqynyn joıý, jylý kózderi men jelilerin jańǵyrtý, «aýyldyq densaýlyq saqtaýdy jańǵyrtý jónindegi» ulttyq jobany iske asyrýǵa tıisti qarajat bólindi.
— Memleket basshysynyń tapsyrmasy boıynsha, bazalyq zeınetaqy mólsherin kezeń-kezeńimen arttyrý jalǵasyp jatyr. Onyń eń tómengi mólsheri kúnkóris deńgeıiniń 60 paıyzdan 65 paıyzǵa deıin, al eń joǵary mólsheri 100 paıyzdan 105 paıyzǵa deıin ósti. Tıisinshe, jıyntyq zeınetaqynyń eń tómengi mólsheri (yntymaqty jáne bazalyq) 2024 jyly — 86 068 teńgeni, al eń joǵary mólsheri 197 873 teńgeni qurady. 2024 jyldyń 1 qańtarynan bastap yntymaqty zeınetaqy mólsheri 9 paıyzǵa ındeksteldi. Sonymen birge, 2024 jylǵy 1 qańtardan bastap, memlekettik áleýmettik saqtandyrý qorynan tólenetin áleýmettik tólemderdiń mólsheri 7 paıyzǵa artty. Mysaly, eńbekke jaramsyz jáne asyraýshysynan aıyrylǵan 1 mıllıon 382 myń adamǵa 958,3 mlrd teńge, 541,2 myń múgedektigi bar adamǵa — 477,3 mlrd teńge jáne 1 mıllıon 323 myń balaly otbasyǵa 652 mlrd teńge somada tólemder berildi, — dedi mınıstr.
Budan buryn habarlanǵandaı, Ulttyq ekonomıka mınıstriniń birinshi orynbasary Azamat Ámrın donor óńirlerden respýblıkalyq bıýdjetke alynatyn qarajat qanshaǵa qysqaratyny týraly pikir bildirdi.