2024 jyly 20 myńdaı adam el azamattyǵynan bas tartty

ASTANA. KAZINFORM – 2025 jyldyń alǵashqy aıynda 1 513 adam Qazaqstan azamattyǵynan bas tartty. Al ótken jyly 20 myńǵa jýyq otandasymyz ózge eldiń azamattyǵyn alǵan. Bul týraly Іshki ister mınıstrliginiń Kazinform agenttiginiń resmı saýalyna joldaǵan jaýapta aıtylǵan.

— 2025 jyldyń qańtar aıynda 1 513 adam Qazaqstan azamattyǵynan bas tartty, onyń basym kópshiligi Reseı Federatsııasy (1 165), AQSh (51), Túrkııa (41), Kanada (27) jáne Ulybrıtanııa (26) elderine qonys aýdarǵan, - dep málimdedi vedomstvodan.

Sondaı-aq Іshki ister mınıstrligi ótken jyly el azamattyǵynan bas tartqan adamdardyń 85 paıyzy Reseıge kóshkenin málimdedi. 

— 2024 jyly 19 888 adam Qazaqstan azamattyǵynan bas tartty, onyń basym kópshiligi Reseı Federatsııasy (16 941), Túrkııa (725), AQSh (462), Kanada (260) jáne Ulybrıtanııa (168) elderine qonys aýdarǵan, - dep jazylǵan habarlamada.

Odan bólek, 2024 jyly 1 adam Qazaqstan Respýbıkasy azamattyǵynan shyǵarylǵan. 

Zańnamaǵa sáıkes, Qazaqstan Respýblıkasynyń azamattyǵy eki jaǵdaıda toqtatylady: óz erkimen shyqqanda jáne azamattyqtan aıyrǵanda. 

Qazaqstan Respýblıkasynyń azamattyǵyn joǵaltqan adamdar týraly málimetti ishki ister organdary on jumys kúni ishinde Halyqty qujattandyrýdyń derekter bazasyna engizedi.

QR azamattyǵynan shyǵý týraly ótinish Prezıdenttiń atyna jazylady jáne kóshi-qon qyzmetine tapsyrylady. 

Azamattyqtan shyǵý týraly sheshimdi Qazaqstan Respýblıkasy Prezıdenti qabyldaıdy. Qaraý merzimi – 6 aı.

Eske sala keteıik, byltyrǵy zańnamaǵa engizilgen ózgeristerge baılanysty qazirgi kezde Qazaqstan azamattyǵyn alatyn sheteldikter qazaq tilin bilýge mindetti.