2024 jylǵy Astana halyqaralyq forýmyna Majarstan Prezıdenti Katalın Novak qatysady

ASTANA. KAZINFORM - Qazaqstan Respýblıkasynyń Majarstandaǵy Elshisi Jánibek Ábdrashov Majarstan Prezıdentiniń Syrtqy saıasat jónindegi keńesshisi Krıshtof Altýspen kezdesip, Qazaqstan-Majarstan strategııalyq seriktestigi aıasynda ekijaqty qatynastardyń kún tártibindegi ózekti máselelerin talqylady.

Bul týraly QR Syrtqy ister mınıstrliginiń baspasóz qyzmetinen habarlandy.

Elshi Jánibek Ábdrashov majar dıplomatyn Qazaqstandaǵy saıası jáne áleýmettik-ekonomıkalyq reformalardyń barysymen, ishki-syrtqy saıası ahýalmen, ınvestıtsııalyq saıasatpen, sonymen qatar Memleket basshysynyń syrtqy saıası sahnadaǵy belsendiligi týraly qysqasha tanystyryp ótti.

Kezdesý barysynda 2023 jyly ótken eki el qatynastaryndaǵy mańyzdy sharalar boıynsha saǵattaryn teńestirip, qazirgi tańda Qazaqstan Prezıdenti Qasym-Jomart Toqaev pen Majarstan Premer-mınıstri Vıktor Orbannyń byltyr, Astanada ótken kelissózderinen keıin berilgen tapsyrmalardy is júzinde júzege asyrý boıynsha naqty sharalar júrgizilip jatqany aıtyldy.

Krıshtof Altýs óz kezeginde Majarstan Prezıdenti Katalın Novak Memleket basshysynyń 2024 jylǵy Astana halyqaralyq forýmyna shaqyrýyn qabyl alyp, elimizge resmı saparmen keletinin rastady.

Kelissózder qorytyndysy boıynsha dıplomattar eki el arasyndaǵy strategııalyq áriptestikti odan ári nyǵaıtýǵa beıildiligin rastady jáne Qazaqstan-Majarstan qatynastarynyń barlyq salada qarqyndy damýyna senim bildirdi.