2024 jyldyń qarashasynan beri almatylyqtar tumaýdyń eki túrin juqtyrǵan

ALMATY. KAZINFORM – Epıdemııalyq maýsym bastalǵannan beri 232 830 almatylyq tumaýǵa qarsy ekpe aldy. 

Bul týraly qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova óńirlik kommýnıkatsııalar qyzmetinde ótken baspasóz máslıhaty barysynda aıtty.

Spıkerdiń sózinshe, Almatyda 2024 jyldyń qarasha aıynan bastap 168 adam tumaý juqtyrdy. Olardyń kóbi vaktsına almaǵan.

– Naýqastardyń 72 paıyzy tumaýdyń A/H1N1 túrin qalǵandary V tıpti vırýsty juqtyrǵan. Statıstıka kórsetkendeı, jaǵdaılardyń eń kóp paıyzy ártúrli saladaǵy jumysshylar (27,9%), júkti áıelder (23,8%) jáne balalar (23,2%) arasynda tirkelgen. Sondaı-aq qaýip tobynda stýdentter, zeınetkerler jáne jumys istemeıtin azamattar boldy, - dedi Ásel Qalyqova.

Epıdemıolog ınfektsııanyń negizgi sebebi vaktsınatsııadan bas tartý ekenin atap ótti.

Kúzde Almatynyń 232 830 turǵyny tumaýǵa qarsy ekpe aldy. Bul – halyqtyń 10,16 paıyzy. 

Eske salaıyq, ótken aptada megapolıste JRVI, tumaý aýrýlarynyń 17 578 jaǵdaıy tirkelgen.