2023 jyly «Jylý energetıkasy týraly» zań qabyldanady

ASTANA. QazAqparat – Keler jyly atomdyq jáne energetıkalyq qadaǵalaý men baqylaý komıtetiniń rólin kúsheıtetin «Jylý energetıkasy týraly» zań qabyldanady. Bul týraly Energetıka mınıstri Bolat Aqsholaqov Úkimet otyrysynda aıtty, dep habarlaıdy QazAqparat tilshisi.

«2023 jyly «Jylý energetıkasy týraly» zań qabyldanady. Ol óńirlerdi jylýmen jabdyqtaý problemalaryn sheshýge nazar aýdarýǵa múmkindik beredi.

Onyń sheńberinde Atomdyq jáne energetıkalyq qadaǵalaý men baqylaý komıtetiniń róli kúsheıtiledi», - dedi mınıstr.

Aıtýynsha, atalǵan zań arqyly elektr energııasyn ortalyqtandyrylǵan tásilmen satyp alýdy jáne satýdy jolǵa qoıý kózdelip otyr.

«Sondaı-aq, naqty ýaqyt rejıminde teńgerimdeýshi naryqty engizýge baǵyttalǵan naryqtyń jańa maqsatty modeline kóshý kózdelip otyr.

2023 jyldyń 1 toqsanynda eldiń barlyq Jylý elektr ortalyqtary jáne elektr jelileriniń aýdıti aıaqtalady. Bul problemalardy jáne olardyń aǵymdaǵy tehnıkalyq jaı-kúıin anyqtaýǵa múmkindik beredi», - dedi Bolat Aqsholaqov.