2023 jyly Jetisý oblysynda qysqy sport túrlerine arnalǵan eki mektep ashylady
«Jetisý oblysy ákimdiginiń aqparaty boıynsha Alakól aýdany Lepsi aýylynyń sport mektep-ınternatynda 168 bala oqıdy. Onda balalar 5 sport túrimen (erkin kúres, grek-rım kúresi, dzıýdo, boks, shańǵy) aınalysady. Qysqy sport túrlerin damytý úshin 2021 jyldan bastap «Dáýlet Serpın 603» JShS merdigerlik uıymy jergilikti bıýdjet qarajaty esebinen jalpy quny 3,9 mlrd teńgeni quraıtyn Alakól aýdanynyń Lepsi aýylynda sportshylar men jattyqtyrýshylarǵa arnalǵan jataqhanasy bar 180 oryndyq dene shynyqtyrý-saýyqtyrý kesheniniń qurylysyn júrgizýde», - dedi Álıhan Smaıylov jaýabynda.
Premer-Mınıstr dereginshe, qazirgi ýaqytta 1,6 mlrd teńge ıgerildi. Daıyndyq 22 paıyzdy quraıdy. Qurylystyń aıaqtalý merzimi – 2023 jyl.
«Paıdalanýǵa berilgennen keıin dene shynyqtyrý-saýyqtyrý kesheniniń bazasynda qysqy sport túrleri boıynsha Jetisý oblysynyń dene shynyqtyrý jáne sport basqarmasynyń balalar-jasóspirimder sport mektebin ashý josparlanǵan», - dedi ol.
Sonymen qatar Úkimet basshysy 2023 jyly Tekeli qalasynda jergilikti bıýdjet qarajaty esebinen qysqy sport túrleri boıynsha oblystyq mamandandyrylǵan balalar-jasóspirimder sport mektebin ashý josparlanǵanyn atap ótedi.
«Al Taldyqorǵan qalasynda jáne Eskeldi aýdanynda jumys istep turǵan balalar-jasóspirimder sport mektebi bazasynda kelesi jyldan bastap shańǵy jarysy boıynsha bólimsheler (sany keminde 4 adamnan turatyn jattyqtyrýshy-oqytýshylar quramy) ashý josparlanǵan», - dedi Premer-Mınıstr.
