2023 jyly jergilikti jelidegi 59 joba boıynsha qurylys júrgiziledi - Indýstrııa mınıstrligi
«Birinshi kezekte áleýmettik-ekonomıkalyq mańyzdy jobalar boıynsha jumystar josparlanyp otyr. Oblystyq jáne aýdandyq mańyzy bar avtomobıl joldarynda kúrdeli jáne ortasha jóndeýdi qarjylandyrýǵa baǵyttalǵan shyǵystar 2023-2025 jyldarǵa arnalǵan jalpy transfertter retinde jergilikti bıýdjet ıgeretin bazaǵa aýdarylatyn bolady. Onda 444 mlrd teńge somasynda qarajat kózdeledi. Qarjylandyrýdyń bul tetigi jergilikti atqarýshy organdardyń josparlaý tártibin ońtaılandyrýǵa, sondaı-aq jergilikti atqarýshy organdardyń derbestigin nyǵaıtýǵa múmkindik beredi», - delingen QR Indýstrııa jáne ınfraqurylymdyq damý mınıstrliginiń Avtomobıl joldary komıtetiniń málimetinde.
Aıtap aıtqanda, jóndeletin joldardyń tizbesin jergilikti atqarýshy organ aıqyndaıtyn bolady.
Vedomstvo habarlamasynda jol jelisin qalpyna keltirý jumystaryna basymdyq beriletini aıtylǵan. Sondaı-aq, eldi mekender arasyndaǵy kólik qatynasyn jaqsartý úshin jergilikti jeliniń avtomobıl joldaryn qatty jabynǵa aýystyrýǵa da erekshe nazar aýdarylmaq.
Aıta keteıik, Memleket basshysy jol sapasyna qatysty tıisti tapsyrma berip, 2025 jylǵa deıin jergilikti joldardyń keminde 95 paıyzyn jaqsartýdy júktedi.
Osy mindetti júzege asyrý maqsatynda 2025 jylǵa qaraı keminde 27 myń shaqyrym jergilikti joldar boıynsha qurylys pen rekonstrýktsııalaýdy qamtamasyz etý qajet.
