2023 jyly jastarǵa arnalǵan Prezıdenttiń arnaıy ádebı syılyǵy jarııalanady
«Elimizde jas qalamgerler legin qalyptastyryp, olarǵa tıisti qoldaý bildirý, álemdik deńgeıdegi taqyryptarǵa qalam terbeýine múmkindik týǵyzý maqsatynda 2023 jyldan bastap qazaqstandyq jas jazýshylar men aqyndar úshin Prezıdenttiń arnaıy ádebı syılyǵy taǵaıyndalady. Syılyq 18-29 jas aralyǵyndaǵy jas qalamgerlerge «Proza», «Poezııa», «Dramatýrgııa», «Balalar ádebıeti» nomınatsııalary boıynsha buryn jarııalanbaǵan shyǵarmalary úshin tabystalady», - dedi QR Mádenıet jáne sport mınıstrligi Arhıv jáne qujattamany basqarý komıtetiniń tóraǵasy Qýat Borash Ortalyq kommýnıkatsııalar qyzmetinde.
Spıkerdiń aıtýynsha, ár nomınatsııa jeńimpazyna 4 mln teńge júlde beriledi.
«Prezıdenttiń arnaıy ádebı syılyǵy eki jylda bir ret ótkiziledi. Onyń «Abaı» atyndaǵy memlekettik syılyqpen qatar ótpeýi úshin kezektesip uıymdastyrylady», - dedi Q. Borash.
Odan bólek, Qýat Borash ádebıetti qoldaý salasyndaǵy jobalar týraly baıandady.
«Bıyl jańa «Jańa qazaq ádebıeti» jobasy iske qosyldy, onyń aıasynda jas avtorlardyń kitaptary 3 myń dana taralymmen basyp shyǵarylady. Sonymen qatar, avtorlar men baspalardy qoldaý maqsatynda kitap jármeńkeleri ótkiziledi. Mysaly, 28-30 mamyr aralyǵynda «Almaty kitap jármeńkesi» ótkizildi. Jármeńkege ákelingen 14 myńnan astam kitaptyń 70 paıyzy satylǵan. Sondaı-aq, mınıstrlik osy jyldyń 23-25 qarashasynda «Uly Jibek jolymen» X Halyqaralyq kitap jáne polıgrafııa jármeńkesin ótkizýdi josparlap otyr», - dedi Q. Borash.
Eske sala keteıik, «Aıboz» ulttyq ádebı syılyǵy baıqaýyna shyǵarmalar áli de qabyldanyp jatyr. Ótinimdi aiboz@kitap-palatasy.kz elektrondy mekenjaıyna 2022 jylǵy 15 maýsymnan 1 qazanǵa deıin jiberýge bolady. Jeńimpazǵa 5 mıllıon teńge júlde beriledi.
Baıqaýdyń tolyq erejesi men tujyrymdamasy http://kitap-palatasy.kz saıtynda jazylǵan.
