2023 jyly úsh myń shaqyrym jergilikti mańyzdaǵy joldar jóndeledi
ASTANA. QazAqparat – Bıyl birqatar aýqymdy temirjol jobalary júzege asyrylmaq. Bul týraly Premer-Mınıstrdiń birinshi orynbasary Roman Sklıar málim etti, dep habarlaıdy QazAqparat tilshisi.
«Keıingi 3 jylda 8 myń shaqyrymnan astam respýblıkalyq mańyzy bar joldar salyndy ári jóndeldi, sondaı-aq 9,5 myń shaqyrymnan astam jergilikti mańyzy bar joldar jóndeldi. Nátıjesinde, standartty jaǵdaıdaǵy joldardyń úlesi respýblıkalyq jelide 91 protsentke deıin, jergilikti jelide 85 protsentke deıin artty. 2023 jyly 7 myń shaqyrym respýblıkalyq mańyzy bar joldy jáne 3 myń shaqyrym jergilikti jelilerdi qaıta salý jáne jóndeýmen qamtý josparlanǵan», - dedi R. Sklıar Senattaǵy «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy parlamenttik tyńdaýda.
Onyń aıtýynsha, Memleket basshysynyń 2029 jylǵa deıingi saılaýaldy tuǵyrnamasy aıasynda standartty jaǵdaıdaǵy respýblıkalyq mańyzy bar avtomobıl joldarynyń úlesin 100% jáne jergilikti jelidegi avtomobıl joldarynyń úlesin 95% protsentke jetkizý mindeti qoıyldy.
Budan bólek ol birqatar aýqymdy temirjol jobalary da júzege asyrylatynyn aıtty.
«Josparlanǵan sharalardyń nátıjesinde tranzıt kólemi 30% paıyzǵa artady. Jalpy, zamanaýı kólik ınfraqurylymyn qurý elimizdiń tranzıttik áleýetin arttyryp, aımaqtardyń baılanysyn jaqsartady», - dedi Úkimet basshysynyń birinshi orynbasary.
Budan buryn habarlanǵandaı, Premer-Mınıstrdiń birinshi orynbasary elimizdegi jylý elektr stantsııalary men elektr jelilerine revızııa júrgizilip jatqanyn aıtty. Bul tekserý bıyldyń birinshi toqsanynda aıaqtalady.
2025 jyldyń sońyna deıin halyqty aýyz sýmen qamtý 100 paıyzdy quraıdy.
