2023 jyly Ulttyq qordan respýblıkalyq bıýdjetke 2,2 trln teńge baǵyttalmaq
«Zań jobasy Bıýdjet kodeksiniń jańa talaptaryn eskere otyryp ázirlendi. Ulttyq qordan beriletin kepildendirilgen transferttiń kólemi jańa bıýdjettik qaǵıdaǵa sáıkes munaıǵa kesimdi baǵany eskere otyryp aıqyndaldy jáne boljam boıynsha munaı sektory uıymdarynan Ulttyq qorǵa túsetin tikeleı salyqtardyń kóleminen aspaıtyn bolady. Bul rette, zań jobasynda munaıdyń kesimdi baǵasy barrelline 2023 jyly 48,9 AQSh dollary, 2024-2025 jyldary 42,2 - 40,3 AQSh dollary deńgeıinde belgilendi. Osyny eskere otyryp, respýblıkalyq bıýdjetke kepildendirilgen transferttiń mólsheri 2023 jyly 2,2 trln teńge, odan ári 2024 jyly 2 trln teńge jáne 2025 jyly 1,9 trln teńge kóleminde aıqyndaldy», - dedi QR Ulttyq ekonomıka mınıstri Álibek Qýantyrov.
Onyń aıtýynsha, josparly kezeńde tıisti qaǵıdalardy qoldaný Ulttyq qordyń valıýtalyq aktıvterin 2023 jyly 66,7 mlrd AQSh dollaryna deıin qalpyna keltirýge, odan ári 2024-2025 jyldary 78,8 - 93,2 mlrd AQSh dollaryna deıin arttyrýǵa yqpal etedi.
«Zań jobasyn ýaqtyly qabyldaý josparly kezeńde respýblıkalyq bıýdjettiń teńgerimdiligin qamtamasyz etýge jáne osy rette Ulttyq qordyń turaqtandyrý fýnktsııasyn iske asyrýǵa múmkindik beredi», - dedi mınıstr.
