2023 jyly Stýdenttik lıga sporttyń qaı túrlerinen ótedi

ASTANA. QazAqparat – 2023 jyly Stýdenttik lıga sporttyń birneshe túrinen ótkiziledi. Bul jaıynda QR Premer-Mınıstri Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Mektep oqýshylary arasynda sportqa degen qulshynysty yntalandyrý maqsatynda 2021 jyly Ulttyq mektep lıgasy quryldy. Lıga mektep baǵdarlamasyna engen sport túrleri boıynsha 5-6, 7-8, 9-11-synyptar arasynda ótkiziledi. Saıystar mektep, aýdan, oblys jáne respýblıkalyq deńgeılerde ótedi. 2021–2022 oqý jylynda lıgaǵa 10 sport túrinen 1,9 mln oqýshy qatysty. 2020–2021 oqý jylymen salystyrǵan qatysýshylar sany 13,8 paıyz ósti», -delingen Úkimet basshysynyń jaýabynda.

Onyń atap ótýinshe, 2020 oqý jylynan beri joǵary oqý oryndarynda erler men áıelder arasynda basketbol, voleıbol, mını-fýtbol, ústel tennısi, qazaq kúresi, toǵyzqumalaq boıynsha Stýdenttik sport lıgasy ótkiziledi.

Saıystar ýnıversıtet, óńir jáne respýblıka deńgeıinde kezeń-kezeńimen uıymdastyrylady.

«Bıylǵy oqý jylynda stýdenttik sport lıgasyna 65 komandaǵa jasaqtalǵan 15 myńnan asa stýdent qatysty. Stýdenttik lıgany uıymdastyrýǵa sport túrlerinen respýblıkalyq federatsııalar da belsendi aralasýda. Atap aıtqanda, fýtboldan, basketboldan jáne ústel tennısinen stýdenttik lıganyń aqtyq kezeńderi tıisti respýblıkalyq federatsııalardyń qoldaýymen ótti. 2023 jyly Stýdenttik sport lıgasy erler men áıelder arasynda voleıbol, basketbol, fýtzal, ústel tennısi, toǵyzqumalaq, qazaqsha kúres, shahmat boıynsha ótedi», - dedi Álıhan Smaıylov.