2023 jyly respýblıkalyq bıýdjet kontrtsıkldyq qaǵıdalar boıynsha josparlanady

NUR-SULTAN. QazAqparat – Premer-Mınıstrdiń birinshi orynbasary Álıhan Smaıylov Májilis ókilderiniń Ulttyq qor qarajatyn paıdalaný tujyrymdamasyn qaıta qaraý týraly usynysyna jaýap qatty, dep habarlaıdy QazAqparat tilshisi.

«Kontrtsıkldik bıýdjet qaǵıdasy tetigi 2023 jylǵa arnalǵan respýblıkalyq bıýdjetti qalyptastyrý kezinde qoldanylatynyn eskere otyryp, qoldanystaǵy Tujyrymdama sheńberinde tıisti tásilderdiń tıimdiligin qaraý oryndy bolady dep sanaımyz», - delingen depýtattyq saýalǵa berilgen jaýapta.

Sondaı-aq, ol Ulttyq qordan bólingen qarajattyń jumsalýyna monıtorıng jasaıtyn komıssııa bar ekenin eske salady. Qazir bul komıssııanyń quramyna Úkimet músheleri, Parlament depýtattary, quqyq qorǵaý organdary men qoǵamdyq uıymdardyń ókilderi kirip otyr.

«Atalǵan komıssııany Esep komıtetiniń tóraǵasy basqarady. Komıssııa turaqty negizde Ulttyq qordan bólingen qarajattyń maqsatty, zańdy jáne tıimdi paıdalanylýyna monıtorıngteýdi júzege asyrady. Sondaı-aq, Ulttyq qordyń qarajaty esebinen qarjylandyrylatyn ınfraqurylymdyq jáne ındýstrııalyq jobalardyń iske asyrylýyna monıtorıng jáne qarjylyq bóligine aýdıt júrgizedi. Osylaısha, qazirgi kúni Úkimet Ulttyq qordyń basqarý strategııasynyń tıimdiligin arttyrý boıynsha turaqty túrde jumys júrgizýde», - dep jazady Álıhan Samıylov.