2023 jyly negizgi UBT sáýirde ótýi múmkin – Rýslan Emelbaev
Bul týraly Ulttyq testileý ortalyǵynyń dırektory Rýslan Emelbaev Sýleıman Demırel ýnıversıtetinde ótken Ashyq esik kúninde aıtty, dep habarlaıdy QazAqparat.
«Kelesi ereje bekitilgenshe negizgi UBT eki ret bolyp qalady. Bıylǵy oqý jylynda oqýshylarda 5 ret UBT tapsyrýǵa múmkindik bar. Qańtarda, naýryz, tamyzda aqyly negizde ótedi jáne onyń sertıfıkaty joǵary oqý ornynda aqyly negizde oqýǵa jaraıdy. Sondaı-aq eki negizgi UBT-ny tapsyrýǵa múmkindik berilgen. Tirkelý onlaın formatta ótedi, árkim testileý tapsyrý kúnin jáne ýaqytyn ózi belgileı alady», – dedi ol.
Sondaı-aq ortalyq dırektory 2023 jyly negizgi UBT nelikten sáýir jáne shilde aılarynda ótkiziletinin túsindirdi.
«Jyl saıyn negizgi UBT mamyr jáne maýsym aılarynda ótkizilip keldi. Endi oǵan ózgeris engizgeli otyrmyz, jobasy daıyn. Bıylǵy josparymyz boıynsha birinshi múmkindikke tirkelýdi naýryz aıynda ashqaly otyrmyz. Alǵashqy testileýdi sáýir aıynda ótkizýdiń birneshe sebebi bar. Birinshiden, mamyr aıynda mereke kóp. Ekinshiden, bıylǵy oqý jylynda 31 mamyrda ótetin mańyzdy mereke – sońǵy qońyraý bar. Oqýshylardyń bar oıy sońǵy qońyraýdy toılaýda bolady», – dep túsindirdi Rýslan Tohtaruly.
Jańa ózgeristerge mektep oqýshylary rıza ekenin jetkizdi. 10-synyp oqýshysy Hasen Elıfnýrdyń pikirinshe, negizgi testileýdiń sáýir aıyna aýystyrlýy oqýshylar úshin tıimdi.
«Búgingi Ashyq esik kúni maǵan qatty unady, SDÝ-ǵa ekinshi ret kelip otyrmyn. Qyzyqty, naqty aqparattar aldym. Maǵan eń unaǵany – negizgi UBT-nyń sáýir aıyna aýystyrylýy. Naýryz jáne mamyr aılarynda merekeler óte kóp, is-sharalar jıi ótedi, sondyqtan oqýshylardyń oıy sol jaqta bolady. Sáýir aıynda ótkizilýi durys sheshim dep esepteımin. Rýslan myrzanyń aıtqan sheshimin qoldaımyn. Sondaı-aq «Qazaqstan tarıhy» páni boıynsha 20 suraq, al «Oqý saýattylyǵy» boıynsha 15 suraq bolatyny da unady. Sebebi elimizdiń tarıhyn bilý óte mańyzdy», – dedi oqýshy.
Ulttyq testileý ortalyǵy Ǵylym jáne joǵary bilim mınıstrligine usynǵan jańa jobada dıstraktorlar (jaýap nusqalary) sany ózgertilgen. ıAǵnı bir durys jaýaby bar test tapsyrmalarynda nusqalar sany 5-ten 4-ke deıin, bir nemese birneshe durys jaýaby bar test tapsyrmalarynda (úsh durys jaýaptan kóp emes) nusqalar sany 8-den 6-ǵa deıin azaıady.
Sondaı-aq UTO dırektory Rýslan Emelbaevtyń aıtýynsha, suraqtar sanynda da ózgerister bolady. «Oqý saýattylyǵy» boıynsha 15 suraq: 5 suraqtan 3 mátin (200-350sóz) beriledi, al «Qazaqstan tarıhy» boıynsha 20 suraq: bir durys jaýapty 10 tapsyrma, mánmátin negizinde 10 tapsyrma beriledi. Esterińizge sala keteıik, bul ózgerister qazirgi tańda testileý ortalyǵy tarapynan joba retinde usynylǵan.
