2023 jyly munaıǵa degen suranys rekordtyq deńgeıge jetedi – halyqaralyq uıym

BAKÝ. QazAqparat – Halyqaralyq energetıka agenttigi (HEA) munaıǵa álemdik suranys 2023 jyly táýligine 1,9 mln barrelge ósip, táýligine 101,7 mln barrelge jetedi dep boljap otyr. Bul týraly QazAqparat menshikti tilshisi uıymǵa silteme jasap habarlaıdy.

«Qytaı koronavırýs shekteýlerin joıylǵannan keıin munaıǵa suranystyń jartysyna jýyǵyn qamtamasyz etpek. Bul rette 2023 jyly álemde munaıǵa suranys ósýiniń negizgi kózi avıatsııalyq otyn bolady, oǵan suranys táýligine 840 myń barrelge artady, delingen HEA esebinde.

Agenttik sondaı-aq 2023 jyly álemdik munaı jetkiziliminiń ósimi táýligine 1 mln barrelge deıin baıaýlaıdy dep boljap otyr.

Aldyńǵy jyly bul kórsetkish 4,7 mln barrelge artqan bolatyn. OPEK + quramyna kirmeıtin elder bıyl munaı usynysyn táýligine 1,9 mln barrelge ulǵaıtady, al OPEK+ elderiniń usynysy Reseıde óndiristiń tómendeýine baılanysty táýligine 870 myń barrelge qysqarady. HEA málimetinshe, bıyl jetkizilim ósimi boıynsha AQSh kósh bastap otyr, odan keıin ekinshi jyl qatarynan «qara altyn» óndirisiniń jyldyq rekordyn ornatqan Kanada men Brazılııa tur. Baıandamada álemdik baqylanatyn munaı qory qarasha aıynda 79,1 mıllıon barrelge ósip, 2021 jyldyń qazan aıynan bergi eń joǵary deńgeıge jetkeni atap ótildi.

Alaıda, 2023 jyldyń basynda munaı qorynyń balansy batystyń Reseı eksportyna sanktsııalarynyń yqpalynan tez nasharlaýy múmkin. Taýar naryǵy, ásirese dızel otyny munaıǵa degen suranystyń ósýine baılanysty eń úlken qaýip-qaterge ushyramaq.

Foto: iea.org