2023 jyly medıtsınalyq qyzmetkerlerdiń jalaqysy 2 ese ósýi múmkin – mınıstr
«Biz árbir medıtsınalyq qyzmetkerge ótemaqy bergimiz keledi, biraq myna mańyzdy máseleni eskerýimiz kerek: dáriger qabyldaýynda bolatyn ár naýqas koronavırýs ınfektsııasymen aýyrmaıdy. Eger dáriger ınfektsııalyq statsıonarda jumys isteıtin bolsa – bul jerde dárigerge tónetin qaýip, táýekel deńgeıi múldem basqa. Mysaly, dáriger ota jasap jatqan naýqas gepatıt nemese JITS-pen aýyrýy múmkin. Bul da dáriger úshin qaýipti. Barlyq dáriger Gıppokrat antyn berý arqyly naýqastyń ómiri úshin kúresip, táýekel etýge daıyn bolady. Jalpy alǵanda, Úkimettiń, Memleket basshysynyń qoldaýymen medıtsınalyq qyzmetkerler eńbegine laıyqty jalaqy alýǵa qol jetkizdik. 2023 jyly medıtsınalyq qyzmetkerlerdiń jalaqysy 2 ese ósýi múmkin», - deıdi QR Densaýlyq saqtaý mınıstri Alekseı Tsoı.
Onyń aıtýynsha, Qazaqstanda jasalǵan ókpeni jasandy jeldetý apparatynyń kepildik merzimi – 3 jyl.
«Medıtsınalyq qurylǵylarǵa qatysty zańnamalyq deńgeıde bekitilgen talaptar bar. Qazaqstanda jasalǵan ókpeni jasandy jeldetý apparattary elimizdegi statsonarlarda synaqtan ótti. Ol naýqastarǵa qoldanýǵa jaramsyz jáne aqaý bolyp jatqan jaǵdaıda óndirýshige qaıtarylady. Juqpaly aýrýy bar adamdardy qabyldaıtyn árbir aýrýhanada ókpeni jasandy jeldetý apparaty kem degende 15% bolýy kerek degen usynys aıttyq. Bul normatıvterdi oryndaý óte mańyzdy. Qazirgi ýaqytta osyndaı qurylǵylar qosymsha satyp alynyp, aımaqtarǵa jetkizilýde», - deıdi ol.
Eske sala ketsek, buǵan deıin elimizde ınfektsııalyq jáne provızorlyq statsıonarlarda 3 379 ókpeni jasandy jeldetetin apparat bar ekenin jazdyq. Qosymsha 2 619 dana osyndaı apparat satyp alynady, onyń ishinde 1 500 apparat – otandyq ónim.