2023 jyly qylmystyq atqarý júıesiniń medıtsınalyq qyzmeti Densaýlyq saqtaý mınıstrligine beriledi
NUR-SULTAN. QazAqparat – Kelesi jyly kámeletke tolmaǵandar men áıelderdi ustaýǵa arnalǵan tergeý ızolıatorlaryndaǵy medıtsınalyq fýnktsııalar Densaýlyq saqtaý mınıstrligine beriledi. Bul týraly Іshki ister mınıstri Erlan Turǵymbaev málim etti, dep habarlaıdy QazAqparat tilshisi.
Sottalǵandardy medıtsınalyq qamtamasyz etý fýnktsııalaryn Densaýlyq saqtaý mınıstrligine berý baǵytyna toqtalǵan mınıstr, bul boıynsha usynys daıyn ekenin, osy jyly tıisti zańnama ázirlenetinin aıtty.
«Kelesi jyly kámeletke tolmaǵandar men áıelderdi ustaýǵa arnalǵan tergeý ızolıatorlaryndaǵy medıtsınalyq fýnktsııalardy Densaýlyq saqtaý mınıstrligine berý josparlanyp otyr. 2023 jyly Qylmystyq atqarý júıesiniń barlyq medıtsınalyq qyzmeti Densaýlyq saqtaý mınıstrligine beriledi», - dedi E. Turǵymbaev Senattaǵy polıtsııa qyzmetine qatysty Úkimet saǵatynda.
Sonymen qatar ol probatsııa qyzmetiniń esebinde turǵan adamdarǵa áleýmettik-quqyqtyq kómek alýǵa kómektesý fýnktsııalaryn jergilikti atqarýshy organdarǵa berý qadamdaryna da toqtaldy.
Olardyń qatarynda: medıtsınalyq, psıhologııalyq kómek berý, jumyspen qamtamasyz etý ortalyqtary arqyly jumysqa ornalastyrý, bilim alýǵa kómektesý, qujattardy alý jáne qalpyna keltirý fýnktsııalary bar.
Budan buryn habarlanǵandaı, Erlan Turǵymbaev ishki ister organdaryn qajet emes fýnktsııalardan bosatý jumystaryn baıandady.
