2023 jyly elordada mekteptegi oqýshylar orny 2 ese artady
ASTANA. QazAqparat - 2023 jyly elordada mekteptegi oqýshylar orny 2 esege artady. Bul týraly búgin qala halqynyń aldynda esep berip jatqan Astana ákimi Baqyt Sultanov aıtty, dep habarlaıdy QazAqparat tilshisi.
«Bilimniń basy - beınet, sońy - zeınet ekenin bilesizder. ıAǵnı, áý bastan bilim joly - aýyr jol. Alaıda, qazirgi zaman talaby - oqý protsesterin jeńildetý. Qoljetimdi, yńǵaıly etý. Qazir ne kóp, aqparat kóp. Biraq osy aqparattyq aǵynnyń arasynan ózine keregin ajyrata bilý - mańyzdy qadam. Biz osy baǵyt boıynsha, ıaǵnı, azamatqa keregin taýyp berý, yńǵaıly etý, qoljetimdi qylý jolynda tynbaı eńbek etýdemiz. Halyq sany ósken saıyn qosymsha mektepter qurylysyn salýǵa, balabaqshada oryn tapshylyǵyn joıýǵa basymdyq beriledi», - dedi qala basshysy.
Onyń aıtýynsha, mektep jáne mektepke deıingi bilim berýde eki másele bar. Atap aıtqanda, balalardy balabaqshamen 100 paıyz qamtý jáne oqý oryndaryn tolyqtaı jetkilikti etý ákimdik aldyndaǵy úlken mindet bolyp otyr. Bul problemanyń týyndaýyn halyqtyń tabıǵı ósimimen qatar ishki kóshi-qonnyń joǵary bolýy áser etýde.
«Bul problemalardy qalaı sheshemiz? Balabaqshalarǵa memlekettik tapsyrys ornalastyramyz. Qazirgi ýaqytta ol 40 paıyzdy quraıdy. Sonymen qatar 4 jańa balabaqsha salamyz. Onyń biri kórý qabileti buzylǵan balalarǵa arnalady. Mektepter boıynsha 2023 jylǵa deıin 161 myń oqýshy ornyna jańadan taǵy 120 myń oqýshy orny qosylady. Eki ese artatyn bolady», - dedi ol.
B.Sultanov dereginshe, ótken jyly 4 jańa mektep ashylsa, qańtar aıynda №20 mektep óz jumysyn bastady. Al jazda Jumabaev dańǵyly boıyndaǵy jańa mektep paıdalanýǵa beriledi.
