2023 jyly elimizdegi birqatar mádenı shara TÚRKSOI uıymy deńgeıinde ótedi

ASTANA. QazAqparat – Keler jyly memleket jáne qoǵam qaıratkeri Temirbek Júrgenovtiń 125 jyldyǵy, aqyn Muzafar Álimbaevtyń 100 jyldyǵy, aktrısa Bıken Rımovanyń 100 jyldyǵy tek el ishinde ǵana emes, TÚRKSOI uıymy deńgeıinde atalyp ótedi. Bul týraly QazAqparat Mádenıet jáne sport mınıstrliginiń baspasóz qyzmetine silteme jasap habarlaıdy.

Mádenıet jáne sport mınıstrligi Býrsa qalasynda ótip jatqan TÚRKSOI Turaqty keńesiniń HHHІH otyrysy barysynda halyqaralyq uıymǵa múshe memlekettermen osyndaı kelisimge keldi. Bul usynysty mınıstr Dáýren Abaevqa halyqpen kezdesýler barysynda el azamattary jetkizgen bolatyn. Ótinishter qarastyrylyp, Mádenıet komıtetine tıisti tapsyrmalar berilgen edi.

«Mınıstrlik aldaǵy ýaqytta birneshe is-sharany TÚRKSOI uıymymen birlesip ótkizýge nıetti. Solardyń qatarynda materıaldyq emes mádenı muralardy nasıhattaý boıynsha «KYMYZFEST» festıvalin erekshe atap ótý qajet. Biz qazaq kınolaryna da halyqaralyq deńgeıde qoldaý kórsetkimiz keledi. Sondaı-aq, túrki halyqtarynyń ortaq tarıhyn eskere otyryp, sımvolızm men geraldıkalyq elementterdi zertteý boıynsha jumystar júrgizetin bolamyz. Qazaqstan tarapynan aıtylǵan usynystardyń bári baýyrlas halyqtardyń baı tarıhyn tereńirek túsinýge, sondaı-aq túrkitildes memleketter arasyndaǵy qarym-qatynasty nyǵaıtýǵa negiz bolady», - dedi atalǵan jıynǵa qatysqan QR MSM Mádenıet komıtetiniń tóraǵasy Roza Káribjanova.

Keńes otyrysy barysynda túrki áleminiń mádenı baılanystaryn arttyrýǵa baǵyttalǵan ekijaqty kezdesýler de uıymdastyryldy. Bul rette Qazaqstan, Ázerbaıjan, Ózbekstan, Túrikmenstan elderimen ortaq jobalardy talqylap jatyr.

Aıta keteıik, Býrsa qalasy buǵan deıin túrki áleminiń 2022 jylǵy mádenı astanasy retinde tanylǵan bolatyn. Jıyn qorytyndysy boıynsha túrki áleminiń 2023 jylǵy mádenı astanasy bolyp Ázerbaıjannyń Shýsha shahary jarııalandy.

Sondaı-aq, Túrkııada taǵy bir aýqymdy is-shara – «Qorqyt Ata» kınofestıvali ótip jatyr. Onyń aıasynda Qazaqstannyń kıno kúnderi uıymdastyrylyp, túrik azamattary «Uly dala tańy», «Muzbalaq», «Dos-Muqasan», «Muqaǵalı» fılmderin tamashalaýǵa múmkindik aldy.

Foto : gov.kz