2023 jyly aıyppul mólsheri qalaı ózgeredi

ASTANA. QazAqparat - Jaqynda el prezıdenti Qasym-Jomart Toqaev «2023 – 2025 jyldarǵa arnalǵan respýblıkalyq bıýdjet týraly» zańǵa qol qoıǵan edi. Soǵan sáıkes Qazaqstanda jańa aılyq eseptik kórsetkish (AEK) – 3450 teńge bolyp belgilendi. Osylaısha, 2023 jyldyń 1 qańtarynan bastap jol qozǵalysy erejelerin buzǵany úshin aıyppul, bıýdjetke tólenetin basqa da mindetti tólemderdiń jańa mólsheri belgili boldy. Kelesi jyldan bastap aıyppul kólemi birden 13 paıyzǵa óspek. Osyǵan baılanysty jol erejesin buzǵany úshin qansha aıyppul salynatyny jóninde jeke-jeke toqtalyp kóreıik.

Jyldamdyqty arttyrǵany úshin tólenetin aıyppul kólemi

2023 jyly avtomobıl qozǵalysynyń jyldamdyǵyn 10-20 kılometrge arttyrǵany úshin júrgizýshiler 5 AEK nemese 17 250 teńge aıyppul tóleıtin bolady. Qazir bul aıyppul kólemi - 15 315 teńge.

Al saǵatyna 20-40 kılometrge arttyrsa, 10 AEK nemese 34 500 teńge mólsherinde aıyppul salynady, bıyl - 30 630 teńge.

Jyldamdyqty saǵatyna 40 kılometrden asyrǵany úshin 20 AEK nemese 69 myń teńge aıyppul tóleıdi. Bul 2022 jyly 61 260 teńgeni quraǵan bolatyn.

Al ákimshilik jaza qoldanylǵannan keıin bir jyl ishinde jyldamdyqty qaıta arttyrǵan jaǵdaıda 30 AEK nemese 103 500 teńge aıyppulmen jazalanady. Qazir bul aıyppul kólemi 91 890 teńgeni qurap otyr.

Kólik júrgizýge quqyǵy joq azamattar qansha aıyppul tóleıdi

Avtokólikti júrgizýge quqyǵy joq júrgizýshige 20 AEK nemese 69 myń teńge aıyppul salynady, 2022 jyly ol 61 260 teńge.

Kólikti júrgizý quqyǵynan aıyrylyp, kólik aıdaǵany úshin 50 AEK nemese 172 500 teńge aıyppul salynady ne 20 táýlikke qamaýǵa alynady.

Jol belgilerin elemegen jaǵdaıda

Jol belgileri men onyń talaptaryn saqtamaǵany úshin 3 AEK nemese 10 350 teńge aıyppul tóleıdi. Qazir 9 189 teńge.

Baǵdarshamnyń «qyzylyna» toqtamaǵan nemese jol dıspetcheriniń tyıym salý qımylyna qaramaǵan jaıǵdaıda 10 AEK nemese 34 500 teńge aıyppul salynady. 2022 jyly 30 630 teńge boldy.

Quqyq buzýdy qaıtalasa, aıyppul kólemi 15 AEK 2022 jylǵy 45 945 teńgeniń ornyna 51 750 teńgege deıin ósedi.

Jol qozǵalysy erejelerin buzyp, jaıaý júrginshiler joly, jol jıekteri nemese trotýarmen júrse, 15 AEK nemese 51 750 teńge aıyppul tóleıdi, qazir 45 945 teńgeni qurap otyr.

Aıaldama/avtoturaq erejesin buzǵan jaǵdaıda

Kólikti turaqqa durys qoımaǵan jaǵdaıda da salynatyn aıyppul mólsheri artty. Mysaly, aıaldama nemese avtoturaq qaǵıdalaryn buzǵandarǵa 5 AEK nemese 17 250 teńge aıyppul salynady. 2022 jyly ol 15 315 teńge.

Trotýarda, gúlzarlarda, balalar jáne sport alańdaryna kóligin qoıyp ketip, sondaı-aq basqa da avtokólikterdiń júrýine kedergi jasasa, 10 AEK nemese 34 500 teńgege deıin aıyppul tóleıdi, qazirgi tańda ol 30 630 teńgeni quraıdy.

Aqyly turaqqa aqsha tólemegen jaǵdaıda 3 AEK nemese 10 350 teńge aıyppul salynady, 2022 jyly 9 189 teńge bolǵan edi.

Kólikti toqtatý talaby oryndalmaǵan jaǵdaıda

Qyzmetkerdiń kólikti toqtatý týraly talabyn oryndamaǵan jaǵdaıda 40 AEK nemese 138 myń teńge aıyppul salynady. Aıta keteıik, aıyppuldyń bul túri 11 qyrkúıekte ákimshilik quqyq buzýshylyq týraly kodekske túzetýler engizilgen kezde onyń mólsheri ósken bolatyn. Qazirgi kezde 30 AEK nemese 91 890 teńgeni quraıdy.

Al bir jyl ishinde qaıtalap buzǵany úshin 5 táýlikke deıingi merzimge qamaýǵa alynyp, mashına aıdaý quqyǵynan aıyrylady. Kólik júrgizý quqyǵynan aıyrylǵan azamattar jolda polıtsııaǵa toqtamaı ótip ketse, 60 AEK aıyppul salynady, al bul 2023 jyly 207 myń teńge bolmaq.

Jolaýshylar men júkterdi tasymaldaý erejelerin buzyp, qaýipsizdik belbeýin taqpaǵan jáne rýlde otyryp, telefondy paıdalanǵan jaǵdaıda 5 AEK aıyppul salynady, ıaǵnı 2023 jyly 17 250 teńge bolmaq. Al 2022 jyly bul 15 315 teńge boldy.

Jaıaý júrginshilerge qatysty aıyppuldar

Jaıaý júrginshilerge arnalǵan oryndardaǵy jol qozǵalysyna qatysty erejeler oryndalmasa, 6 126 teńgeniń ornyna 6 900 teńge - 2 AEK mólsherinde aıyppul salynady.

Bir jyl ishinde qaıtalansa, aıyppul kólemi birden 10 AEK-ke deıin artyp, 30 630 teńgeniń ornyna 34 500 teńge tóleıtin bolady.

Jol erejesine qatysty basqa da aıyppul kólemi

Ákimshilik quqyq buzýshylyq týraly kodekske qyrkúıek aıynda polıtsııa qyzmetkerleri men tergeýshilerdiń qyzmettik mindetterin atqarý kezinde olardyń zańdy ókimderine baǵynbaıtyndar nemese olardyń jumysyna kedergi keltiretinder úshin 30 AEK - 103 500 teńge mólsherinde aıyppul salýdy nemese 15 táýlikke deıin qamaýǵa alýdy kózdeıtin ózgerister engizildi. 2022 jyly bul aıyppul 91 890 teńgeni quraǵan edi.

Bir jyl ishinde taǵy da qaıtalansa, 15-ten 20 kúnge deıin qamaýǵa alynady. Qamaýǵa alynbaǵandar úshin jaza retinde 50 AEK - 175 500 teńge (2022 jyly 153 150 teńge) mólsherinde aıyppul salynady.

Qoǵamdyq orynda túkirgeni úshin, sondaı-aq belgilenbegen jerlerde qoqys tastaǵany úshin 5 AEK nemese 17 250 teńge aıyppul salynady. Al qaıtalanǵan jaǵdaıda 10 AEK-ke nemese 34 500 teńge tóleıtin bolady.