2023 jyly Astanaǵa 300-den astam elektroavtobýs jetkiziledi
ASTANA. QazAqparat – 2023 jyly Astanaǵa 300-den astam elektroavtobýs jetkiziledi, dep habarlaıdy QazAqparat tilshisi.
«Astanada 2023 jyly jelige 300-den astam elektroavtobýs shyǵady. Elorda ákimdigi avtoparkti qoǵamdyq kólikpen jańartý jáne tolyqtyrý boıynsha, onyń ishinde jeke ınvestıtsııalardy jumyldyrý esebinen júıeli jumys júrgizýde. Jańa elektr avtobýstary avtoparkti aıtarlyqtaı jańartýǵa, jańa marshrýttardy engizýge, aıaldamalarda avtobýstardyń kútý aralyǵyn qysqartýǵa múmkindik beredi», - delingen ákimdiktiń resmı saıtynda jarııalanǵan aqparatta.
«City Transportation Systems» JShS qazirgi ýaqytta avtobýs parkin 300-den astam elektroavtobýspen jańartý jáne tolyqtyrý boıynsha úsh ınvestormen jumys júrgizip jatyr. Jeke ınvestıtsııalar esebinen qalada avtobýs parki de salyndy.
Buǵan deıin Astanada jelige 115 elektroavtobýs shyǵarylǵan bolatyn. Bıyl qys mezgilinde taǵy 50 elektroavtobýs shyǵarý josparlanyp otyr.
Sonymen qatar, bıyl jyl basynan beri qoǵamdyq kólik marshrýttarynyń 27 syzbasyn ońtaılandyrý boıynsha jumys júrgizildi. Jańa marshrýttar iske qosylyp, Bus lane jańa ýchaskeleri engizildi. 15 aıaldama paıdalanýǵa berildi. Sońǵy jyldary 70 jyly aıaldama ornatyldy. Taǵy 20 jyly aıaldama boıynsha ınjenerlik jelilerge qosylý boıynsha jumystar júrgizilip jatyr.
Foto: Astana q. ákimdiginiń baspsóz qyzmeti
