2023 jyly Almaty bıýdjetine sheteldik týrısterden 2 mlrd teńgeden asa jarna túsedi
Almaty ákiminiń orynbasary Álisher Ábdiqadyrov óz baıandamasynda qalalardaǵy, aýdandardaǵy jataqhanalardy, qonaq úılerdi, jalǵa beriletin turǵyn úılerdi qospaǵanda, ornalastyrý oryndarynda bolǵan árbir táýlik úshin týrıstik jarna alynatynyn jáne oǵan turý quny kirmeıtinin aıtty.
«Operatorlar (qonaq úıler) jarna alýdy júzege asyrady, olar sheteldikterdi alynatyn týrıstik jarna týraly habardar etedi, esepke alady jáne jergilikti bıýdjetke aýdarady. QR bıýdjet kodeksine sáıkes sheteldikter úshin týrıstik jarna memlekettik bıýdjetke salyqtyq emes túsimder bolyp tabylady»,- dedi ol.
Qala ákiminiń orynbasary sheteldikter úshin týrıstik jarna mólsherlemelerin esepteý ótken kúntizbelik jyldyń statıstıkalyq derekteri negizinde júrgiziletinin atap ótti.
«Ótken jyldyń uqsas kezeńimen salystyrǵanda sheteldik týrıster sany jıyrma paıyz jáne odan kóp bolǵan jaǵdaıda bolý qunynyń 5 (bes) paıyzy kóleminde mólsherleme qoldanylady. Ornalastyrý oryndarynda sheteldik týrısterdiń sany azaıǵan jaǵdaıda sheteldikter úshin týrıstik jarna mólsherlemesiniń kólemi túzetiledi»,- dedi Álisher Ábdiqadyrov.
2021 jyldyń alty aıynda Almatyda qyzmet kórsetilgen sheteldik týrıster sany 54 myńnan asty. Byltyr sheteldik týrıster sany 2,8 esege, ıaǵnı ıaǵnı 97 myń adamǵa ósti.
«2023 jyly sheteldik týrısterdiń sany 400 myń adamnan asady dep boljanýda jáne týrıstik jarnadan túsetin aqsha qarajatynyń boljamdy mólsheri – 2 mlrd 342 mln teńge. Týrıstik jarnadan túsken qarajat jergilikti bıýdjetten týrızmdi damytýǵa baǵyttalatyn bolady»,- dedi ol.
Buǵan deıin 2023 jyldan bastap Almatyǵa kelgen sheteldikterden týrıstik jarna alynatyny týraly jazǵan bolatynbyz.
https://kaz.inform.kz/news/2023-zhyldan-bastap-almatyga-kelgen-sheteldikterden-turistik-zharna-alynady_a4014548
