2023 jyly adamdar Marsqa kóshirilmek, biraq olar qaıta oralmaıdy

Olar Marsqa baramyn deýshilerge qoıylatyn talapty da kópshilik nazaryna usyndy, dep habarlaıdy BAQ.KZ.

Marstyń bolashaq turǵyndary ushqysh nemese áskerı qyzmetker bolýy shart emes. Tek jas mólsheri 18-den assa bolǵany. Sondaı-aq, atalmysh jobaǵa qatysýshylar adamdarmen tiltabysqysh, shyǵarmashylyq qabileti damyǵan jáne qorshaǵan ortaǵa beıimdelgish bolýy shart.
«Bizdi árbir astronavtyń ózge planetada qalaı kún kóretindigi, bir-birlerimen qalaı jumys isteıtindigi, Jerden Marsqa deıingi uzaq saparǵa qalaı tózetindigi alańdatady», deıdi jobanyń medıtsına salasy boıynsha dırektory, Nasanyń burynǵy ǵylymı qyzmetkeri Norbert Kraft.
Mars turǵyndary bir-birimen aǵylshyn tilinde sóılesetin bolady. Biraq, olardyń dinine, ultyna eshqandaı shekteý qoıylmaq emes.

Aıta ketý kerek, «Qyzyl» planetaǵa attanǵandarǵa keri qaıtar jol joq, olar máńgilikke attanady. Al, Mars turǵyndary úshin ǵımarattar men ınfrastrýktýrany aldyn ala avtomattar turǵyzady.
Ekspedıtsııany uıymdastyrýshylardyń aıtýynsha, adamdardyń bir-aq baǵytqa qaraı ushýy tehnıkalyq jumystardy jeńildetip, qarjyny da ájepteýir únemdeıdi. Onyń ústine, alǵashqy marstyqtardyń ómirinen realıtı-shoý retinde translıatsııa júrgizilmek. Telejobadan kelip túsken qarajat shyǵynnyń jartysynyń ornyn jabady dep kútilýde.
Mars One qorynyń ókilderi ushýǵa tilek bildirgen myńdaǵan adamnan hat kelip túskendigin aıtty. Al, irikteýdiń ózi bolsa telearnalardan tikeleı efır arqyly kórsetiletin bolady.