2023 jyly 56 eldi mekenge tabıǵı gaz jetkiziledi – mınıstr

ASTANA. QazAqparat – Bıyl 107 eldimeken kógildir otynmen qamtyldy, aldaǵy jyly taǵy 56 eldi mekenge gaz jetkizý jospary bar. Bul týraly Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Bıyl jyl qorytyndysy boıynsha halyq tutynatyn kógildir otyn jetkizý kórsetkishi 59%-ǵa jetti. 2022 jyly 96,1 mlrd teńgege 142 gaz jobasy iske asyryldy. Bul 284,8 myń adamdy nemese 107 eldi mekendi tabıǵı gazben qamtýǵa múmkindik berdi. Kelesi jyly gazǵa qol jetkizetin halyqtyń úlesin 59,9%-ǵa jetkizemiz. 2023 jyly jospar boıynsha 73,9 mlrd teńge somaǵa 86 jobany iske asyrý mindeti tur. Bul 166,6 myń adamdy nemese 56 eldi mekendi gazben qamtamasyz etýge múmkindik beredi», - dedi Bolat Aqsholaqov OKQ-de ótken brıfıngide.

Mınıstrdiń málimdeýinshe, bıyl gaz tasymaldaý júıesiniń odan ári damýyn aıqyndaıtyn 2015-2030 jyldarǵa arnalǵan bas shema qaıta pysyqtaldy.

«Bıylǵy jyldyń qorytyndysy boıynsha gaz óndirý kólemi – 51,7 mlrd tekshe metr. Gaz óndirisiniń tómendeýi munaı óndirý deńgeıiniń tómendeýimen baılanysty. Aldaǵy jylǵa arnalǵan gaz óndirý jospary 53,5 mlrd tekshe metr dep belgilenip otyr», - deıdi ol.

Sondaı-aq, vedomstvo basshysy aldaǵy jyly «Suıytylǵan munaı gazynyń aınalymyn retteý protsesteriniń reınjınırıngi máseleleri boıynsha» zań qabyldanatynyn aıtty. Aıtýynsha, jańa zań suıytylǵan gaz aınalymynyń ashyqtyǵy men ádil baǵa belgileýdi qamtamasyz etedi.

Foto: onenergyconsulting.it