2023 jylǵa deıin Astana mańaıynda 40 dárigerlik ambýlatorııa ashylady
ASTANA. QazAqparat - Jyl saıyn elordaǵa 50-60 myń adam kelip qosylady jáne bul medıtsınalyq uıymdarǵa aýyr júkteme salady, dep habarlaıdy QazAqparat tilshisi.
Bul týraly Astana qalasy Qoǵamdyq densaýlyq saqtaý basqarmasy basshysynyń mindetin atqarýshy Álııa Rústemova aıtty.
Turǵyndarǵa medıtsınalyq kómekti qoljetimti etý úshin Astanada ýchaskeler sany artty.
«2018 jyldyń basynda 1 dárigerlik ýchaskege 2200 adamnan keletin. Sondyqtan qosymsha taǵy 134 ýchaske ashyldy jáne qazir 1 ýchaskede 1700 adam bar. Sonymen birge, turǵyndardyń alǵashqy medıtsınalyq-sanıtarlyq kómekke qoljetimdiligin arttyrý úshin ákimdik «Úıdegi dáriger» jobasyn iske asyrýdy bastady», - dedi Álııa Rústemova Astanada ótken baspasóz máslıhatynda.
Onyń aıtýynsha, «Úıdegi dáriger» - turǵyn úı keshenderiniń birinshi qabatynda ashylatyn yqsham dárigerlik ambýlatorııalar. Bıyl 8 ambýlatorııa ashyldy jáne taǵy 11 nysandy ashý josparlanyp otyr.
«2023 jylǵa deıin halyq tyǵyz ornalasqan aýdandarda, ásirese qala mańaıynda taǵy 40 dárigerlik ambýlatorııa ashý josparda bar», - dedi Á. Rústemova.
