2023 jylǵa deıin 600 shaǵyn aýylǵa ınternet tartylady

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın shaǵyn aýyldardy ınternetpen qamtamasyz etý qalaı iske asatynyn aıtty, dep habarlaıdy QazAqparat tilshisi.

Halyq aldyndaǵy eseptik kezdesýin qorytyndylaǵan Baǵdat Mýsın ortalyq kommýnıkatsııalar qyzmetinde ótken brıfıngte 2023 jylǵa deıin ǵalamtorsyz otyrǵan 1200 aýyldyń teń jartysy zamanaýı ıgilikke qol jetkizetinin aıtty.

«6459 aýyldyń 5300-i ınternetke qosylǵan. Biraq sonyń 510-ynda ınternet sapasy óte tómen. Bul aýyldardyń árqaısysyn anyqtadyq. Endi telekom-operatorlarmen jumys istep jatyrmyz. Bizde jospar, olarda osyǵan arnalǵan aqsha bar. Byltyr zańnamaǵa túzetý engizip, radıojıilikti paıdalanǵany úshin tólenetin ınvestıtsııanyń 90 paıyzyn aýyldyq jerlerde ınternet jelisin damytýǵa baǵyttaý jolǵa qoıylǵan bolatyn», - deıdi Baǵdat Mýsın.

Mınıstr áli de bolsa 1200-ge jýyq aýylda eshqandaı ınternet joq ekenin eske saldy. Ony sheshý úshin Starlink, One Web, SES sııaqty sheteldik kompanııalarmen memandým aıasynda pılottyq jobalar iske asyrylmaq.

«Ol aýyldardyń máselesin eki jolmen sheshemiz. Birinshi joly – radıojıilikter arqyly bolady. Ekinshi joly – tómen orbıtaly jerserik toptary arqyly ınternet jetkizý. 2022 jyldyń aıaǵyna deıin ınterneti nashar 510 eldi mekendegi jaǵdaıdy túzeımiz. Al ınternet múlde joq 1200 eldi mekenniń teń jartysyna tómen orbıtaly jerserik toptary arqyly baılanys jetkiziledi», - dedi ol.