2023 jyldyń І toqsanynda mashına jasaý salasyna 208 mln dollar tikeleı sheteldik ınvestıtsııa tartyldy
«Búgingi tańda ekonomıka qurylymynda mashına jasaý salasynyń úlesi - 1,5, al óńdeýshi ónerkásipte 13 paıyzdy quraıdy. Salada qazirgi ýaqytta 3 myń 800 kásiporyn qyzmet etýde. Jumyspen qamtylǵandardyń sany 118 myńnan astam adamdy qurap otyr. Sońǵy 5 jyl ishinde salanyń naqty ósimi 2,3 eseni qurady. Eń úlken ósimdi avtomobıl jasaý salasy kórsetip otyr. 2022 jyldyń qorytyndysy boıynsha mashına jasaýǵa shamamen 500 mln AQSh dollardy quraıtyn tikeleı ınvestıtsııa tartyldy. Bul kórsetkish rekordtyq bolyp sanalady. 2023 jyldyń 1-shi toqsanynda salaǵa tartylǵan tikeleı sheteldik ınvestıtsııalar 208 mln AQSh dollardy qurady», - dedi mınıstr.
Onyń dereginshe, óńdeýshi ónerkásip salalarynyń ishinde mashına jasaý eń qarqyndy damyp kele jatqan sala sanalady.
«Salystyrmaly túrde sońǵy 5 jyl ishinde óńdeýshi ónerkásiptiń ortasha ósý qarqyny 4,5 paıyz bolsa, al mashına jasaýdyń ósý qarqyny 17,6 paıyzdy qurap otyr. Bul úrdis bıyl da baıqalady, 6 aıdyń qorytyndysy boıynsha naqty kólem ındeksi 128,8 paıyzdy qurap 1 trln 800 mlrd teńge somasyna ónim shyǵaryldy. Qoldanystaǵy óndiristerdiń qýaty birtindep artatynyn eskeretin bolsaq, óndiris kólemi odan ári ósetin bolady», - dedi Marat Qarabaev.
