2023 jyldan bastap veterınarlardyń jalaqysy kezeń-kezeńimen ósedi

ASTANA. QazAqparat – 2023 jyldan bastap veterınarııa qyzmetkerleriniń jalaqysyn kezeń-kezeńimen ósirý josparlanǵan. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtyldy, dep habarlaıdy QazAqparat tilshisi.

«Qazirgi ýaqytta Aýyl sharýashylyǵy mınıstrligi 55 is-sharadan turatyn Veterınarııa júıesin reformalaý jónindegi uıymdastyrý is-sharalarynyń josparyn bekitti. Onda osy saýalda kóterilgen usynystar men salanyń problemaly máseleleri de qamtylǵan. Osylaısha jospar aıasynda 2023 jyldan bastap veterınarııa qyzmetkerleriniń jalaqysyn kezeń-kezeńimen ósirý kózdelgen.

Budan basqa, Úkimet «Bıologııalyq qaýipsizdik týraly» Zańdy iske asyrý aýqymynda I jáne (nemese) II patogendi toptardyń patogendi bıologııalyq agentterimen jumys isteıtin veterınarııalyq qyzmet salasyndaǵy qyzmetkerlerdiń jalaqysyn ulǵaıtý bóliginde «Qazaqstan Respýblıkasy Úkimetiniń 2015 jylǵy 31 jeltoqsandaǵy № 1193 qaýlysyna ózgerister engizý týraly» qaýly jobasyn qarap jatyr», - dedi Úkimet basshysy jaýabynda.

Sonymen qatar ol veterınarııa mamandaryn azamattyq qyzmetshiler sanatyna qosýǵa qatysty da jaýap berip, memlekettik veterınarııa uıymdary Qazaqstan Respýblıkasynyń zańnamasynda belgilengen tártippen memlekettik-kommýnaldyq kásiporyndar nysanynda da, memlekettik-kommýnaldyq mekemeler nysanynda da jumys isteıtinin aıtqan. Onyń atap ótýinshe, zańnamaǵa sáıkes, memlekettik veterınarııa uıymdarynyń veterınarııa dárigerleri jergilikti atqarýshy organdar uıymdy memlekettik-kommýnaldyq mekemeler nysanynda qurǵan jaǵdaıda azamattyq qyzmetshiler sanatyna jatqyzylýy múmkin.

«Búgingi tańda veterınarııa salasyndaǵy ýákiletti organǵa veterınarııa dárigerine júkteme normatıviniń úlgilik qaǵıdalaryn ázirleý jáne bekitý quzyretin berý máselesi pysyqtalýda», - dedi Álıhan Smaıylov.