2023 jyldan bastap Almatyǵa kelgen sheteldikterden týrıstik jarna alynady

ALMATY. QazAqparat- «Almaty qalasynda sheteldikter úshin týrıstik alym mólsherlemesin bekitý týraly» máslıhattyń sheshimi daıyndaldy, dep habarlaıdy QazAqparat tilshisi.

«2023 jylǵy 1 qańtardan bastap Almaty qalasynda sheteldikter týrısterdi ornalastyrý oryndarynda turý qunynyń 5% mólsherinde týrıstik alym mólsherlemeleri bekitilsin», - delingen Ashyq NQA portalynda jarııalanǵan qujatta.

Resmı málimetke súıensek, 2021 jyldyń ekinshi toqsanynda Almatyda kelý týrıstik oryndarynda 54 238 adamǵa, 2022 jyldyń ekinshi toqsanynda 151 467 adamǵa qyzmet kórsetildi.

Bir jylda týrısterdiń sany 97 229 adamǵa, ıaǵnı 179,2 paıyzǵa ósken.

Bul rette, sheteldikter úshin týrıstik salyqty tóleý qaǵıdalary ótken kúntizbelik jyldyń sáıkes kezeńimen salystyrǵanda týrısterdi ornalastyrý oryndarynda sheteldik týrıster sany artqan jaǵdaıda týrıstik salyqtyń mynadaı mólsherlemelerin belgileıdi:

5%-ǵa deıin – turý qunynyń 1%-y mólsherinde;

5-ten 10%-ǵa deıin – turý qunynyń 2%-y mólsherinde;

10-nn 15%-ǵa deıin – turý qunynyń 3%-y mólsherinde;

15-ten 20%-ǵa deıin – turý qunynyń 4%-y mólsherinde;

20% jáne odan joǵary - turý qunynyń 5% mólsherinde.

Osylaısha, Almaty qalasy máslıhatynyń 2023 jylǵy 1 qańtardan bastap týrısterdi ornalastyrý oryndarynda sheteldikter úshin týrıstik alymǵa 5 paıyzdyq mólsherlemeni qoldaný týraly sheshimi qabyldandy.

Qujat Ashyq NQA veb-saıtynda 30 jeltoqsanǵa deıin ornalastyrylǵan.