2023 jyly shetelden 23 mıllıard dollar ınvestıtsııa tartyldy – Prezıdent
ASTANA. KAZINFORM – Prezıdent Qasym-Jomart Toqaev Almatyda Ujymdyq qaýipsizdik týraly shart uıymy Parlamenttik Assambleıa Keńesiniń otyrysyna qatysýshylarmen kezdesý barysynda Qazaqstan UQShU-ǵa tóraǵalyǵy aıasynda qaýipsizdikti qamtamasyz etýdi kózdeıtin halyqaralyq uıymdarmen jáne qurylymdarmen yqpaldastyqty nyǵaıtýǵa nıetti ekenin aıtty. Bul týraly Aqordanyń baspasóz qyzmeti málim etti.
– BUU, TMD jáne ShYU-nyń salalyq qurylymdarymen yntymaqtastyqty keńeıtý asa mańyzdy dep sanaımyz. Bıyl qańtar aıynda UQShU Hatshylyǵy men TMD Terrorızmge qarsy kúres ortalyǵy arasyndaǵy yntymaqtastyq týraly memorandýmǵa qol qoıyldy. Biz muny quptaımyz, – dedi Prezıdent.
Memleket basshysy spıkerlerge Qazaqstanda júrgizilip jatqan reformalar qoǵamnyń barlyq salasyn, sonyń ishinde saıasat, ekonomıka jáne ıdeologııa baǵyttaryn júıeli túrde jańǵyrtýdy kózdeıtinin aıtty.
Qasym-Jomart Toqaev ekonomıka salasyna toqtala kelip, elimizdiń JІÓ kólemi 265 mıllıard dollarǵa jetkenin málimdedi.
– 2023 jyly shetelden 23 mıllıard dollardan astam tikeleı ınvestıtsııa tartyldy. Elimizdiń halyqaralyq rezervteri 100 mıllıard dollarǵa jýyqtady. Halyqaralyq valıýta qorynyń boljamy boıynsha bıyl Qazaqstannyń jan basyna shaqqandaǵy jalpy ishki ónimi 13 paıyzǵa ósip, shamamen 15 mıllıard dollardy quraýǵa tıis. Jaqynda men kásipkerlik erkindik pen básekelestiktiń damýyn qamtamasyz etý, memlekettiń ekonomıkadaǵy úlesin qysqartý jáne bıznes shyǵyndaryn azaıtý arqyly ekonomıkany yryqtandyrýǵa negiz qalaıtyn Jarlyqqa qol qoıdym. Ekonomıkalyq qyzmet salasyndaǵy qylmystyq quqyqbuzýshylyqtardy dekrımınalızatsııalaý arqasynda bıznestiń quqyqtary men zańdy múddelerin qorǵaý isi aıtarlyqtaı kúsheıdi, – dedi Prezıdent.
Sondaı-aq memleket basshysy Qasym-Jomart Toqaev UQShU elderimen aradaǵy saýda-sattyqtyń qarqyndy ósip kele jatqanyna kóńili tolatynyn jetkizdi.
– Byltyr Qazaqstan men Reseıdiń saýda kólemi 26 mıllıard dollarǵa jetti. Al Qyrǵyzstanmen aradaǵy saýda aınalymy 1 mıllıard 571 mıllıon dollardy, Tájikstanmen 1 mıllıard 130 mıllıon dollardy, Belarýspen 912 mıllıon dollardy qurady, – dedi Prezıdent.
Jıyn sońynda Qasym-Jomart Toqaev UQShU Parlamenttik Assambleıa Keńesiniń otyrysy Uıymǵa múshe ár eldiń múddesin eskere otyryp, memleketterdiń ulttyq zańnamalaryn ilgeriletýge jáne ózara úılestirýge eleýli úles qosatynyn atap ótti. Sondaı-aq Keńes qabyldaıtyn qujattar UQShU-ny odan ári damytýǵa septigin tıgizetinine senim bildirdi.
Kezdesý barysynda UQShU Parlamenttik Assambleıasynyń Tóraǵasy – Reseı Memlekettik dýmasynyń Tóraǵasy Vıacheslav Volodın, Belarýs Respýblıkasy Ulttyq jınalysy ókilderi Palatasynyń Tóraǵasy Igor Sergeenko, Tájikstan Respýblıkasynyń Madjlısı Olı Madjlısı mıllı tóraǵasy Rýstamı Emomalı sóz sóıledi.
