2023 jyly Qazaqstanda kúrish baǵasy qalaı ózgerdi
ASTANA. KAZINFORM – Egis alqaptary men kúrish óndirisiniń tómendeýi ımport pen baǵanyń ósýine ákelýi múmkin. Bul týraly QR Básekelestikti qorǵaý jáne damytý agenttigi jazdy.
QR Básekelestikti qorǵaý jáne damytý agenttigi kúrishti kóterme satý naryǵyna taldaý júrgizdi. Elimizde kúrish óndiretin negizgi 20-dan astam óndirýshi Qyzylorda oblysynda ornalasqan.
Taldaý barysynda menshikti óndiristiń tómendeýi jáne ımport úlesiniń jyldar boıynsha dınamıkada 4-ten 12%-ǵa deıin ulǵaıǵany baıqalǵan.
Sýdyń jetispeýshiligi ári shyǵyndardyń ósýi saldarynan egis alqaptarynyń azaıǵany anyqtalyp otyr.
Bul ishki baǵa ósiminiń joǵary dınamıkasynyń basty sebebi boldy. Eger 2022 jyly kúrish baǵasynyń ósýi 36%-dy qurasa, 2023 jyly – 39%-dy qurady, bul ótken jyly 3,4%-dy quraǵan áleýmettik mańyzy bar azyq-túlik taýarlary baǵasynyń ósýiniń jalpy deńgeıinen aıtarlyqtaı asyp túsedi.
Monopolııaǵa qarsy den qoıý sharalary kúntizbelik jyl ishinde baǵa ósý dınamıkasynyń tómendeýin qamtamasyz etti. Baǵa boıynsha sóz baılasý negizinde 6 kúrish óndirýshi 68,7 mln teńge aıyppul túrindegi ákimshilik jaýapkershilikke tartyldy.
Degenmen, óndiris kóleminiń tómendeýi men kúrish baǵasynyń kóterilýiniń túpki sebepteri saqtalýda. Bul sýarmaly sýdyń jetispeýshiligi, aýyl sharýashylyǵy tehnıkasy, tyńaıtqyshtar men syrttan ákelinetin qaptama baǵasynyń kóterilýi, sýbsıdııalardyń ýaqytyly berilmeýi.
Osyǵan oraı, monopolııaǵa qarsy organ Aýyl sharýashylyǵy mınıstrligine sýbsıdııalar bólý kezinde kúrishti basym daqyldar tizimine engizý, ońtústik óńirlerdi sýmen qamtamasyz etýdi josparlaýdy uıymdastyrý, kúrish óndirýshilerine jeńildetilgen nesıelendirý úlesin arttyrý, kúrishti bólshek saýda jelilerimen tikeleı satyp alý jáne tyńaıtqyshtar men qaptama materıaldarynyń otandyq óndirisin damytý jóninde usynystar engizdi.
