2023 jyly 21 myńnan astam etnıkalyq qazaq qandas mártebesin aldy

2023 jyly 21 325 etnıkalyq qazaq tarıhı otanymen tabysyp, qandas mártebesin aldy. Jalpy 1991 jyldan beri respýblıkaǵa 1 mln 128,3 myń etnıkalyq qazaq oraldy, dep habarlaıdy Kazinform QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, ótken jyly Qazaqstanǵa kelgen qandastardyń jartysy (50,3%) Ózbekstannan, 21,5% – Qytaıdan, 10,2% – Mońǵolııadan, 9,2% – Túrikmenstannan, 6,8% – Reseıden jáne 2% basqa elderden.

2024 jylǵy 1 qantardaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,2%-dy, eńbekke qabiletti jastan kishi 30,9%-dy jáne zeınetkerler 8,9%-dy quraıdy.

Eńbekke qabiletti jastaǵy qandastardyń ishinen bilim deńgeıi boıynsha 15,3%-y joǵary bilimdi, 32,4%-y orta kásibı bilimdi, 44,3%-y jalpy orta bilimdi jáne 8,3%-ynyń bilimi joq.

Qonys aýdarǵan etnıkalyq qazaqtar respýblıkanyń túrli óńirlerine qonystandy.

Sonymen birge, qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary.

2024 jylǵy 1 qańtardaǵy jaǵdaı boıynsha qonystandyrý óńirlerine 2 337 qandas kóshirildi, bul 2023 jylǵa bekitilgen kvotaǵa sáıkes keledi.

Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (2023 jyly – 241,5 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (2023 jyly – 51,7-den 103,5 myń teńgege deıin) mólsherinde.

2023 jyly 2126 qandasqa túrli qoldaý sharalary kórsetildi. Atap aıtqanda, 735 adam turaqty jumysqa ornalastyryldy, 2126 adam birjolǵy sýbsıdııa aldy, al 694 qandasqa turǵyn úı shyǵyndary sýbsıdııalandy.

Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4 mln teńgege deıin mólsherinde birjolǵy óteýsiz jáne qaıtarymsyz negizde engizildi.

Esterińizge sala keteıik, ótken jyly pılottyq rejımde Qazaqstan elshilikteri arqyly «bir tereze» qaǵıdaty boıynsha qandas mártebesin berý tetigi iske asyryldy. Pılottyq joba sheńberinde elimizge barý, jumys orny, turǵyn úı berý múmkindikteri týraly máseleni sheshýge jáne respýblıka aýmaǵyna kirmeı-aq qandas mártebesin alýǵa bolady. Búgingi tańda etnıkalyq qazaqtardan jańa formatta 6 203 ótinish qabyldandy.