Bıylǵy 6 aıda reseılik ınvestorlar Qazaqstan ekonomıkasyna 1 mlrd dollar ınvestıtsııa saldy

Reseılik kompanııalar Qazaqstan ekonomıkasyndaǵy jetekshi ınvestorlardyń bestigine kiredi. Bul týraly Aqordada Reseı Prezıdenti Vladımır Pýtınmen kelissózderden keıingi baspasózge arnalǵan brıfıngte Memleket basshysy Qasym-Jomart Toqaev aıtty, dep habarlaıdy Kazinform.

«Shaǵyn jáne keńeıtilgen quramdaǵy kezdesýlerde ekijaqty qatynastar men halyqaralyq kún tártibiniń keń aýqymdy máselelerin talqyladyq. Ózara tıimdi yntymaqtastyqtyń orasan zor áleýetin eskere otyryp, saıası, ekonomıkalyq, ınvestıtsııalyq jáne mádenı-gýmanıtarlyq baılanystardy keńeıtýge degen ózara umtylysty taǵy da atap óttik. Sońǵy ýaqytta turaqty ósim kórsetip otyrǵan saýda-ekonomıkalyq, ınvestıtsııalyq ózara is-qımylǵa erekshe nazar aýdaryldy. Reseı Qazaqstannyń iri saýda-ekonomıkalyq seriktesi mártebesin senimdi túrde saqtap keledi. Sońǵy úsh jylda bizdiń elderimiz arasyndaǵy ózara saýda kólemi 30 paıyzdan astam ósti. Ótken jyly Qazaqstan statıstıkasy boıynsha taýar aınalymy rekordtyq 27 mlrd dollardy qurady. Osy jyly da oń dınamıka saqtalyp otyr. 8 aıdyń qorytyndysy boıynsha 17 mlrd dollar»,-dedi Qasym-Jomart Toqaev.

Memleket basshysy taýar aınalymyn odan ári arttyrý úshin úlken múmkindikter bar ekenin atap ótti.

«Bul turǵyda eki eldiń isker toptary arasyndaǵy baılanystardyń aıtarlyqtaı ońtaılandyrylǵanyn atap ótemiz. Reseılik kompanııalar Qazaqstan ekonomıkasyndaǵy jetekshi ınvestorlardyń bestigine kiredi. Olardyń jalpy ınvestıtsııasy 20 mıllıard dollardan asty. Osy jyldyń birinshi jartyjyldyǵynda ǵana Qazaqstan ekonomıkasyna reseılik ınvestıtsııalar 1 mlrd dollardan astam ınvestıtsııa saldy. Bul ótken jylǵy deńgeıden 20 paıyzǵa artyq. Óz kezeginde qazaqstandyq ınvestıtsııa kólemi 6 mlrd dollarǵa jetti», - dedi Qazaqstan Prezıdenti.