2023 jyldyń 11 aıynda elektrondyq saýda kólemi 2,2 trln teńgeni qurady

ASTANA. KAZINFORM – Ótken jyldyń 11 aıynda elektrondyq saýda kólemi shamamen 2,2 trln teńgeni qurady. Bul týraly búgin Úkimet otyrysynda Saýda jáne ıntegratsııa mınıstri Arman Shaqqalıev aıtty.

«Jahandyq elektrondyq saýda naryǵy ozyq qarqynmen ósýde. Elektrondyq saýda jan-jaqty damýǵa yqpal ete otyryp, álemdik ekonomıkalyq ósýdiń jańa draıverine aınaldy. Halyqaralyq sarapshylardyń boljamy boıynsha 2026 jylǵa qaraı V2S álemdik elektrondyq naryǵy 8,2 trln AQSh dollaryn quraıdy. Olardyń baǵalaýy boıynsha 2022 jyly bul kórsetkish 5,7 trln AQSh dollary boldy. 2022 jylǵy qorytyndy boıynsha Qazaqstanda elektrondyq saýdanyń úlesi 12,5 paıyzdy qurady. Bul shamamen 2 trln teńge», - dedi mınıstr.

Onyń atap ótýinshe, Internet arqyly negizinen úı taýarlary, kıim jáne aıaq kıim, tamaq ónimderi, kosmetıka, dári-dármekter satylǵan.

«2022 jyldyń qorytyndysy boıynsha elektrondyq saýda qyzmetter naryǵynyń kólemi 1,2 trln teńgeni qurady. Onyń 50,3 paıyzy jolaýshylardy tasymaldaý qyzmetine tıesili. Ótken jyldyń 11 aıynda elektrondyq saýda kólemi shamamen 2,2 trln teńgeni nemese bólshek kóleminen 13 paıyzdy qurady. 2023 jyldyń qorytyndysy boıynsha josparlanǵan elektrondyq saýda úlesi 13,2 paıyzdy quraýy tıis», - dedi Arman Shaqqalıev.

Mınıstrliktiń aldynda elektrondyq saýdanyń úlesin 2030 jylǵa qaraı 20 paıyzǵa deıin jetkizý mindeti tur