2023 jyldy jaqsy nátıjelermen shyǵaryp salamyz – Premer-Mınıstr
QR Premer-Mınıstri Álıhan Smaıylov 2023 jyldy qorytyndylap, jaqsy nátıjeler bolǵanyn atap ótti, dep habarlaıdy Kazinform.
«Úkimettegi osy jylǵa arnalǵan josparly zań jobalaryn qarap boldyq. Endi olardy Parlamentke engizý qajet. Jalpy, 2023 jylǵa arnalǵan zań jobalaý jumystary josparyn oryndaldy dep maquldaýdy usynamyn. Bıyl qoǵamdyq tártipti qamtamasyz etý, ekonomıka jáne bıýdjet, medıa, sondaı-aq áleýmettik saladaǵy zańnamalyq bastamalardy iske asyrý boıynsha aýqymdy jumystar atqaryldy», - dedi Álıhan Smaıylov Úkimettiń qorytyndy otyrysynda.
Premer-Mınıstr Úkimettiń zań jobalaryn Ádilet mınıstrligine, Úkimetke jáne Májiliske engizý merzimderi de birneshe ret buzylǵanyn, jańa jospardy iske asyrýda zań jobalaryn ýaqytyly engizýge erekshe nazar aýdarý qajettigin aıtty.
«Búgin Úkimettiń bıylǵy qorytyndy otyrysyn ótkizdik. Barlyq Úkimet múshelerin, shaqyrylǵandar men BAQ ókilderin kele jatqan Jańa jylmen quttyqtaımyn! Biz 2023 jyldy jaqsy nátıjelermen shyǵaryp salǵaly otyrmyz. Bárimiz birge úılesimdi, aýqymdy jumys atqardyq. Sol úshin barshańyzǵa alǵys aıtqym keledi. Kelesi jylǵa aıqyndalǵan mindetterdi jaqsy bilesizder. Alda atqaratyn jumys kóp. Sondyqtan, Sizderge zor densaýlyq, otbasylaryńyzǵa baqyt, eńbekterińizge tabys tileımiz», - dedi Álıhan Smaıylov.
Buǵan deıin Úkimette 2024 jyly qandaı zań jobalary ázirlenetini talqylanǵan edi.
Sondaı-aq, QR Ádilet mınıstri A. Esqaraev memlekettik organdardyń zań jobalaý jumysyn nashar josparlaǵanyn synǵa aldy.
