2023-2025 jyldary 149 ǵylymı-tehnıkalyq tapsyrma iske asyrylmady — JAP
ASTANA. KAZINFORM — 2023-2025 jyldary 393 ǵylymı-tehnıkalyq tapsyrmadan somasy 67 mıllıard teńgeni quraıtyn 149 tapsyrma iske asyrylmady. Bul týraly Quryltaı otyrysynda Joǵary aýdıtorlyq palata tóraǵasy Álıhan Smaıylov aıtty.
— Basymdyqtar men ǵylymı-tehnıkalyq tapsyrmalar ǵylymı tapsyrystardyń naqtylyǵyn qamtamasyz etpeıdi. Basymdyqtardyń máni — mindetterdi naqty irikteý. Óıtkeni memlekettiń olarǵa jumsaıtyn resýrstary shekteýli. Іs júzinde 2025-2027 jyldarǵa arnalǵan 7 basymdyq pen 153 arnaıy baǵyttar bekitildi. Mundaı tizbe basymdyq ıdeıasyn burmalap, kez kelgen zertteýdi basymdyqtar qataryna jatqyzýǵa múmkindik beredi. Ǵylymı-tehnıkalyq tapsyrma túpkilikti nátıjeni tekserý parametrlerin jáne engizý tetigin qamtıtyn naqty basqarý tapsyrmasy bolýy kerek, — dedi ol.
Alaıda palata tóraǵasynyń sózine qaraǵanda, tapsyrmalar birqatar jaǵdaıda nátıjesi men ony tekserý ólshem-sharttary jetkilikti naqtylanbaı, jalpylama túrde qalyptastyrylady.
— Salalyq mınıstrlikterdiń osy máseledegi róli tómen deńgeıde bolyp otyr. Olar naqty salalyq problemalardy árdaıym aıqyndaı bermeıdi. Qoldanbaly nátıjeni jáne ony paıdalaný tetigin belgilemeıdi. Nátıjesinde ǵylymı-tehnıkalyq tapsyrmalardyń edáýir bóligi rastalǵan salalyq suranyssyz qalyptastyrylady. 2023-2025 jyldary 393 ǵylymı-tehnıkalyq tapsyrmadan somasy 67 mıllıard teńgeni quraıtyn 149 tapsyrma iske asyrylmady. Bul rette tapsyrmalardyń iske asyrylmaý sebepterine taldaý da jasalmady, — dedi Álıhan Smaıylov.
Sonymen qatar ol ǵylymnyń ekonomıkadaǵy úlesi jalpy ishki ónimge shaqqanda 0,16 paıyzdy ǵana quraıtynyn aıtty.