2022 jyly «Túrkistan-Shymkent-Tashkent» baǵytyndaǵy halyqaralyq temirjol qurylysy bastalady
TÚRKІSTAN. QazAqparat - 2022 jyly «Túrkistan-Shymkent-Tashkent» baǵytynda joǵary jyldamdyqty poıyzǵa arnalǵan halyqaralyq temirjoldyń qurylysy bastalady, dep habarlaıdy QazAqparat tilshisi.
Túrkistan oblysynyń ákimi Ómirzaq Shókeev atalǵan jobanyń mańyzy zor ekenine toqtaldy. Sondaı-aq, óńir basshysy temirjoldyń salynýy Túrkistan óńiriniń ǵana emes, elimizdiń damýyna oń serpin beretinin jetkizdi.
«Apta basynda Nur-Sultanda Qazaqstan Respýblıkasynyń Prezıdenti Qasym-Jomart Toqaev pen Ózbekstan Respýblıkasynyń Prezıdenti Shavkat Mırzıeev kezdesip, memleketaralyq kelisimderge qol qoıdy. Sonyń ishinde Túrkistan oblysyn damytý úshin asa mańyzdy «Túrkistan-Shymkent-Tashkent» temirjoly salynatyny habarlandy. Eki Prezıdent jobany maquldap, Úkimet basshylaryna atalǵan jobany júzege asyrý jóninde tapsyrma berdi. Ol magıstraldyń jobalyq-smetalyq qujaty daıyn», -dedi oblys ákimi.
«Qazaqstan temir joly» kompanııasy basshylyǵynyń habarlaýynsha, qurylys 2022 jyldyń basynda bastalady. Temirjol Túrkistannan bastalyp, Shymkent qalasymen qatar Ordabasy, Qazyǵurt, Saryaǵash aýdandaryn qamtıdy. Joǵary jyldamdyqty temirjol magıstraliniń qurylysy aıaqtalǵan soń týrızm jáne ózge de salalarda myńdaǵan jumys orny qurylyp, ishki jáne syrtqy týrızm de qatar damymaq. Sondaı-aq osy joba arqyly baýyrlas eki eldiń arasyndaǵy baılanys nyǵaıyp, barys-kelis kóbeıedi.
«Taǵy bir qýanyshty jańalyq, Nur-Sultanda ınvestıtsııalyq forým ótti. Sol jerde «Qasqasý» shańǵy týrızm ortalyǵyn salý boıynsha Jol kartasyna jeti jaqty kelisimshartqa qol qoıyldy. Onyń ishinde Úkimet, mınıstrlikter, sheteldik ınvestor, bankter, ákimshilik bar. Bul týrıstik ortalyq Túrkistan óńiriniń ekonomıkasyn kóterýge úles qosady», – dedi Ó.Shókeev.
Sonymen birge óńir basshysy «Darbaza-Maqtaaral-Jızaq» temir jolynyń qurylysy bastalatynyn, ol eki eldiń taýar aınalymyna oń yqpalyn tıgizetinin málimdedi. Sondaı-aq, Túrkistan oblysynyń Ózbekstanmen shekaralas aýmaǵynda eki memlekettiń qatysýymen «Ortalyq Azııa» halyqaralyq saýda-ónerkásip kesheni boı kóteretinin jetkizdi.
