2022 jyly Temirtaýda jańa jylý qazandyǵy salynbaq
TEMІRTAÝ. QazAqparat –2022 jyly JEO-2-de jetinshi qazandyq salynbaq. Bul metallýrgter qalasyn turaqty jylýmen qamtamasyz etýdiń kópjyldyq problemasyn sheshýge múmkindik beredi, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbek búgin «ArselorMıttal Temirtaý» AQ basshylyǵymen onlaın-keńes ótkizdi. Bas qosýda jobany iske asyrý barysy men stantsııadaǵy jóndeý naýqany talqylandy.
«Biz qaladaǵy jylý ortalyǵynda 7-shi qazandyq jobasynyń bastalýyna kúsh salýymyz kerek . Jaǵdaı kórsetkendeı, merzimdi odan ári sozý múmkin emes. Bıylǵy jyly jobany aıaqtaýdy barynsha jedeldetý qajet. Qala jobanyń támamdalýyn úshinshi jyl kútýde. Bul birinshi kezekte sheshilýi tıis másele», - dedi Jeńis Qasymbek.
«ArselorMıttal Temirtaý» AQ Bas dırektory Bıdjý Naır qazir tenderler júrip jatqanyn habarlady. Ótken jyldan bastap Podolsk mashına jasaý zaýytynda qazandyq qondyrǵysy jasalýda. Jabdyqtyń bir bóligi daıyn. 28 mamyrǵa deıin qurylys merdigerlik uıymdary anyqtalady.
Keńeste sondaı-aq JEO-2-niń kelesi jylytý maýsymyna daıyndyǵy talqylandy. «ArselorMıttal Temirtaý» AQ bas energetıgi Vladıslav Zamıatın habarlaǵandaı, jóndeý jumystaryna bıyl 2,6 mlrd teńge bólin gen . Jumystar bastaldy.
Esterińizge sala keteıik, aǵymdaǵy jyly aqpanda aıazdy kúnderi temirtaýlyqtar birneshe kúnge jylýsyz qalǵan bolatyn. Belgili bolǵandaı, qalada úsh qazandyqta apat bolǵan. Osyǵan baılanysty páterlerdegi temperatýra normadan tómendep ketti.
Sondaı-aq, oblys basshysy JEO-da jańa 7-shi qazandyqtyń qurylysyn aıaqtaýdy tapsyrǵan edi.
