2022 jyly sozylmaly búırek aýrýlary bar naýqastar regıstri qurylady
NUR-SULTAN. QazAqparat – QR Premer-mınıstriniń orynbasary Eraly Toǵjanov sozylmaly búırek aýrýlary bar naýqastar regıstrin qurý jumystary týraly aıtyp berdi, dep habarlaıdy QazAqparat.
«2022 jyly sozylmaly búırek aýrýy bar naýqastardyń satylary boıynsha regıstrin qurý máselesi pysyqtalýda, bul patsıentterge monıtorıngti kúsheıtýge jáne tıisti sharalar qabyldap, kórsetiletin medıtsınalyq kómektiń kólemi men sapasyna tıisti taldaý júrgizýge múmkindik beredi. Qarsy kórsetilimderi joq patsıentter transplanttaýdy kútý paraǵynda tur», - dep jazdy Eraly Toǵjanov depýtat saýalyna bergen jaýabynda.
Onyń aıtýynsha, búırek transplantatsııasyn kútetin patsıentter jyl saıyn artyp keledi (2019 jyly – 2706, 2021 jyldyń 9 aıynda – 3025). Bul rette 2019 jyly – 136, 2020 jyly – 77, 2021 jyldyń 9 aıynda-97 transplanttaý júrgizilgen.
«Transplantatsııaǵa patsıentter kezegin tómendetý úshin Qazaqstan Respýblıkasynda 2022-2025 jyldarǵa arnalǵan organ donorlyǵy men transplantologııany damytý tujyrymdamasynda 2022 jyldan bastap árbir oblys ortalyǵynda kópbeıindi statsıonarlar bazasynda óńirlik transplantatsııa ortalyqtaryn ashý kózdelgen. Onda tegin medıtsınalyq kómektiń kepildik berilgen kólemi sheńberinde búırekti aýystyrý boıynsha operatsııalar jasaý josparlanyp otyr. Nefrologııalyq beıindegi patsıentterdi medıtsınalyq ońaltý ambýlatorııalyq deńgeıde aqýyz-energetıkalyq jetispeýshilikti dárimen túzeýden turady. Gemodıalızdegi gıperfosfatemııanyń aldyn alý úshin «Sevelamer« preparatymen tegin qamtylady», - dep atap ótti Premer-mınıstrdiń orynbasary.
«Sonymen birge, qazirgi ýaqytta «Salıdat Qaıyrbekova atyndaǵy densaýlyq saqtaýdy damytý ulttyq ǵylymı ortalyǵy» ShJQ RMK «Ketosterıl» preparatyn qazaqstandyq ulttyq dárilik formýlıarǵa engizý jóninde kásibı saraptama júrgizip, keıinnen preparatty ambýlatorııalyq deńgeıde tegin beretin dárilik zattar tizbesine engizedi», - dedi ol.
