2022 jyly órtke qarsy qyzmetke 500-den astam maman qajet bolady
«Memleket basshysynyń 2020 jylǵy 20 qarashadaǵy kúshtik organdardyń eńbekaqysyn júıeleýge qatysty tapsyrmasyna sáıkes, bıylǵy 1 qańtardan bastap TJM qyzmetkerleri men áskerı qyzmetshileriniń jalaqysy orta eseppen 26%-ǵa artty. Bul jumys 2023 jylǵa deıin kezeń-kezeńimen jalǵasatyn bolady», - dep jazdy Roman Sklıar depýtattyq saýalǵa bergen jaýabynda.
Ol sondaı-aq Úkimettiń 2021 jylǵy 13 mamyrdaǵy № 315 qaýlysymen memlekettik órtke qarsy qyzmet organdary qyzmetkerleriniń shtat sany lımıti jańadan qurylatyn órtke qarsy ınfraqurylym obektileri úshin 494-ke ulǵaıtylǵanyn habarlady.
«2022 jyly TJM shtattyq sanyn 547-ge qosymsha arttyrý josparlanǵan. «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» Zań jobasy arqyly azamattyq qorǵaý organdary qyzmetkerleriniń áleýmettik kepildikteri men jeńildikterin jaqsartýǵa baǵyttalǵan túzetýler kózdelgen (turyp jatqan úılerin menshikke alý, qyzmetkerlerdiń balalaryna mektepke deıingi balalar mekemelerinde oryndar usyný jáne t.b. máseleleri)», - dep atap ótti Premer-Mınıstrdiń orynbasary.
«2022 jyly «Qazaqstan Respýblıkasynyń keıbir zańnamalyq aktilerine azamattyq qorǵaý máseleleri boıynsha ózgerister men tolyqtyrýlar engizý týraly» zań jobasyn ázirlep, Parlamentke engizý josparlanýda. Ol órt qaýipsizdigin qamtamasyz etý máselelerin jetildirýge, azamattyq qorǵaý qyzmetkerleriniń, qutqarýshylardyń mártebesi men áleýmettik qorǵalýyn jaqsartýǵa, órtke qarsy erikti quralymdardyń ınfraqurylymyn damytýǵa baǵyttalǵan. Jalpy azamattyq qorǵaý organdarynyń máseleleri ýákiletti organ men Úkimettiń turaqty baqylaýynda», - dep túıindedi R. Sklıar.
