2022 jyly qansha mln tonna munaı ónimderi óndirildi

ASTANA. QazAqparat – Ótken jyly avıaotyn óndirý jospary oryndalmaı qaldy. Bul týraly búgin Úkimet otyrysynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

Mınıstrdiń dereginshe, 2022 jyly munaı ónimderin óndirý kólemi 13,7 mln tonnaǵa jetti. Jyldyq jospar 103,2 paıyzǵa oryndaldy.

Onyń ishinde 5,2 mln tonna dızel otyny, 2,8 mln tonna mazýt, 5 mln tonna benzın óndirildi.

Bul ónimderdiń barlyǵy jyldyq jospar kóleminde boldy. Al avıaotyn óndirý kólemi 97 paıyzǵa oryndalyp, 0,7 mln tonnany qurady.

«Avıaotyn óndirý josparyna qol jetkizbeý Atyraý munaı óńdeý zaýytyndaǵy 2022 jylǵy qazan-qarasha aılarynda ótken jóndeý jumystaryna baılanysty», - dedi Bolat Aqsholaqov.

Sonymen qatar ol 2022 jyly bıtým óndirý kólemi 950 myń tonna bolǵanyn 2022 jylǵy jospar 85,6 paıyzǵa ǵana oryndalǵanyn atap ótti.

«Josparly kórsetkishke qol jetkizbeýdiń negizgi sebebi qymbat ımporttyq shıkizat – Reseıden jetkiziletin gýdrondy qoldanatyn «Qazaq Bitum» JShS-daǵy bıtýmnyń joǵary baǵasymen», - dedi mınıstr.

Bolat Aqsholaqov ótken jyly qýaty 500 myń tonna polıpropılen óndiretin munaı-hımııa zaýyty iske qosylǵanyn, munaı-gaz-hımııa óniminiń kólemi 271,4 myń tonnaǵa jetkenin de aıtty.

Foto: reuters.com