2022 jyly elordada 16 mektep salynady

NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda bıyl salynatyn mektepter jaıly aıtty, dep habarlaıdy elorda ákimdiginiń resmı saıty.

«Balanyń bilim alýǵa degen zeıinin ashý úshin bilim berý sapasyn arttyryp, oqýyna barlyq jaǵdaı jasalyp jatyr. Bárimizge belgili, mektep – balany tulǵa retinde qalyptastyratyn oryn.

Mektep qurylysyna jeke ınvestıtsııalar tartamyz. Investorlarmen kezdesip, bilim berý salasyndaǵy jobalardy, ıaǵnı mektepter men balabaqshalardyń qurylysyn talqyladyq. Investorlarǵa qoıylatyn shart – mektep qurylysyny belgilengen merzimde bitirý», - dep jazdy qala basshysy.

Ákimniń aıtýynsha, bıyl qalada 16 mektep salýdy josparnyp otyr.

«Bıyl 16 mektep salýdy josparlap otyrmyz. Keshendi jospar aıasynda 5 jyldyq kezeńge 70-ke jýyq mektep salý josparlanǵan. Oqý oryndary barlyq aýdandarda, sonyń ishinde eldi mekenderde salynyp jatyr. Oqý oryndaryna qajettilik bar aýdandarǵa basa nazar aýdaramyz.

Memleket basshysynyń tapsyrmasy boıynsha sońǵy jyldary mektep qurylysynyń kólemi aıtarlyqtaı ulǵaıdy. Mysaly, 2019 jyly 6 mektep salynsa, 2020 jyly 11 mektep salyndy.

Ótken jyly 15 mektep saldyq. Bul 40 myńǵa jýyq oqýshy ornyn ashýǵa múmkindik berdi. Jańa mektepter esebinen úsh aýysymdy mektepter sany 5 oqý ornyna qysqardy, sol sııaqty 10 mektepte shamadan tys júkteme máselesi sheshildi», - dep jazdy elorda ákimi.