2022 jyly elimizde 280 mln túp aǵash otyrǵyzylady
NUR-SULTAN. QazAqparat – Aldaǵy jyly elimizdiń ormandy aýmaqtarynda 280 mln túp kóshet egilip, jańa orman tálimbaqtary qurylmaq. Bul týraly QR Ekologııa, geologııa jáne tabıǵı resýrstar vıtse-mınıstri Álııa Shalabekova OKQ-de ótken baspasóz máslıhaty barysynda málim etti, dep habarlaıdy QazAqparat tilshisi.
«Búgingi tańda el aýmaǵynda 218 orman tálimbaǵy bar jáne ol 2649 gektar jerdi alyp jatyr. Aldaǵy jyldary onyń aýmaǵyn 325 gektarǵa deıin keńeıtý mindeti bar. Sondaı-aq, 282 gektar jerde jańa orman tálimbaqtaryn qurý josparlanýda. Sonymen qatar ormandy alqaptarda aǵash otyrǵyzý naýqany da jalǵasyn tabady. 2022 jylǵa arnalǵan jospar boıynsha el kóleminde 112 myń gektar jerge 280 mln túp aǵash otyrǵyzylady», - dedi Á. Shalabaeva.
Vıtse-mınıstrdiń sózine sensek, 2023 jyly Qazaqstannyń orman alqaptarynda 410 mln túp kóshet egilmek.
«Prezıdent tapsyrmasyna sáıkes 2025 jylǵa deıin el kóleminde 714 mıllıonnan astam sekseýil (36 %), 638 mıllıonnan astam qaraǵaı (32%), 120 mıllıon shamasynda shegirshin (6 %), 121 mıllıonǵa jýyq qaıyń (6%) jáne 407 mıllıonnan astam túp (20%) basqa da aǵash túri egilmek», - deıdi ol.
Eske sala ketsek, Memleket basshysy ótken jylǵy Joldaýynda 2025 jylǵa deıin elimizdiń ormandy aýmaǵynda 2 mlrd túp aǵash otyrǵyzý mindetin júktegen edi.
Sondaı-aq, mınıstr orynbasary elimizde otyrǵyzylǵan aǵash kóshetteriniń qanshalyqty jersinip ketýine qatysty pikir bildirgen edi.
