2022 jyly ekonomıkanyń 3,9 paıyzǵa deıin ósýi qamtamasyz etiledi – Asqar Mamın
«Respýblıkalyq bıýdjettiń usynylyp otyrǵan jobasy, eń aldymen, memlekettiń barlyq áleýmettik mindettemelerin tolyq ári ýaqtyly oryndaýǵa jáne de qazirgi jaǵdaılarda ekonomıkanyń sapaly ári ornyqty damýyn qamtamasyz etýge baǵyttalǵan. Daǵdarysqa qarsy makroekonomıkalyq saıasatty iske asyrý - pandemııanyń saldaryn jumsartyp, ekonomıkalyq ósý qarqynyn qalpyna keltirý protsesin iske qosýǵa múmkindik berdi. 2022 jyly ekonomıkanyń 3,9 paıyzǵa deıin ósýin qamtamasyz etý josparlanyp otyr», - dedi Úkimet basshysy.
Onyń aıtýynsha, shıkizattan tys sektor - sapaly ósýdiń negizgi draıverleriniń birine aınalmaq, ári ornyqty ekonomıkanyń negizgi faktory bolyp qala beredi.
«Ekonomıkanyń naqty sektorynyń, bıznestiń damýyna qoldaý kórsetý jáne áleýmettik ınfraqurylymnyń, onyń ishinde densaýlyq saqtaý, bilim berý júıesiniń, mádenıet ári sport salalarynyń jáne de qaýipsizdik pen quqyqtyq tártiptiń ornyqty ári sapaly damýyn qamtamasyz etý - bıýdjet shyǵystarynyń negizgi baǵyttary bolmaq. Usynylyp otyrǵan bıýdjet parametrlerin Respýblıkalyq bıýdjet komıssııasy maquldaǵan», - dedi A. Mamın.
Úkimet otyrysynda QR 2022-2026 jyldarǵa arnalǵan áleýmettik-ekonomıkalyq damý boljamy, «Qazaqstan Respýblıkasynyń Ulttyq qorynan 2022-2024 jyldarǵa arnalǵan kepildendirilgen transfert týraly», «2022-2024 jyldarǵa arnalǵan respýblıkalyq bıýdjet týraly» QR zańdarynyń jobalary men «Qazaqstan Respýblıkasynyń Ulttyq qorynan 2022-2024 jyldarǵa arnalǵan nysanaly transfert bólý týraly» QR Prezıdenti Jarlyǵynyń jobasyna qoldaý jasalyp, maquldandy.
Budan buryn habarlanǵandaı, Úkimet otyrysynda 2022-2026 jyldarǵa arnalǵan áleýmettik-ekonomıkalyq damý boljamynyń jobasy tanystyryldy. 2026 jyly munaı óndirý 107,4 mıllıon tonnaǵa deıin ulǵaıady. 2022 jyly Ulttyq qordan 5 50 mlrd teńg e nysanaly transfert tartylmaq.
