2022 jyly balabaqshalardy qarjylandyrýdyń vaýcherli mehanızmi jappaı engiziledi
NUR-SULTAN. QazAqparat – 2022 jyly mektepke deıingi bilim berýdi qarjylandyrýdyń vaýcherli mehanızmi jappaı engiziledi. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Bilim jáne ǵylym mınıstrligi 2021 jylǵy jeltoqsanǵa deıin mektepke deıingi bilim berýdi qarjylandyrýdyń vaýcherli mehanızmin engizý boıynsha pılottyq jobany aıaqtasyn jáne 2022 jyldan bastap ony jappaı engizýdi qamtamasyz etsin. Bul rette balabaqshalardyń jumysy ata-analardyń qanaǵattaný deńgeıin, balalardyń damý kórsetkishterin, tamaqtaný sapasyn, qoǵamnyń baǵasyn eskere otyryp baǵalanýy kerek», - dedi Úkimet basshysy.
Osyǵan baılanysty Asqar Mamın Bilim jáne ǵylym mınıstrligine 2021 jylǵy 1 sáýirge deıin balabaqshalar jumysy sapasynyń álemdik tájirıbede qabyldanǵan kórsetkishterin bekitýdi jáne engizýdi tapsyrdy.
«Ákimdikter 2021 jyly jeke balabaqshalar jelisin damytý arqyly 32 myń orynǵa deıin ashý boıynsha jumys júrgizsin», - dedi Premer-Mınıstr.
