2022 jyly Almaty joldarynyń sapasyn tekserý kezinde 356 márte buzýshylyq anyqtaldy
ALMATY. QazAqparat - 2022 jyly Almaty joldarynyń sapasyn tekserý barysynda 356 buzýshylyq pen jol-qurylys materıaldarynyń 51%-y talaptarǵa sáıkes kelmeıtini anyqtaldy. Bul týraly Almaty qalasynyń Óńirlik kommýnıkatsııalar qyzmeti alańynda «Jol aktıvteriniń sapasy ulttyq ortalyǵy» RMK Almaty fılıalynyń dırektory Máýlen Alıpov aıtty, dep habarlaıdy QazAqparat tilshisi.
Spıkerdiń aıtýynsha, 2022 jyly kásiporyn fılıaly Almaty qalalyq mobıldilik basqarmasymen jasasqan sharttyń sheńberinde qala joldaryna 473 tekseris júrgizgen.
«Nátıjesinde 356 buzýshylyq anyqtaldy, jol-qurylys materıaldarynyń 1562 synamasy irikteldi jáne synaldy, onyń 795-i nemese 51% - y talaptarǵa sáıkes kelmeıdi. Onyń ishinde ınjenerlik kommýnıkatsııalar júrgizilgen soń asfaltbeton jabynyn qalpyna keltirý obektileri boıynsha 40 tekseris júrgizildi, jol-qurylys materıaldarynyń 109 synamasy iriktelip, synaldy. Onyń ishinde 39 synama talaptarǵa saı kelmeıdi», - dedi Máýlen Alıpov.
Vedomstvo atalǵan máselege baılanysty qala qurylysyn baqylaý basqarmalaryna nusqamalar jibergen, ol boıynsha 11,18 mln teńge kóleminde aıyppul salyndy. 1 merdigerlik uıym lıtsenzııasynan aıyryldy, tehnıkalyq qadaǵalaýdyń 2 ınjeneriniń attestattary kúshin joıdy.
Materıaldar boıynsha ınjener Eskendir Sadyǵulov 2021 jyldyń 1 shildesinen bastap «Qazdorlab» baǵdarlamalyq óniminiń plansheti men mobıldi nusqasyn engizý arqyly zerthanalyq synaqtardyń avtomattandyrylǵan saraptama fýnktsııalary engizilgenin habarlady.
«Planshetke Face ID kómegimen bekitilgen sarapshy ǵana qol jetkize alady. Derekterdi serverge berý ınjenerdiń ornalasqan jerin kórsete otyryp, onlaın rejımde júzege asyrylady. Bul saraptama nátıjelerine túzetýlerdi engizýge múmkindik bermeıdi», - dedi E.Sadyǵulov.
Onyń aıtýynsha, jumystyń qadaǵalanýy, ashyqtyǵy, onyń ishinde obektige geolokatsııalyq baılanystyrý - foto-beıne tirkeý jáne saraptama protsesine qatysýshylardyń barlyǵyn elektrondyq-tsıfrlyq qoltańbasymen bekitý arqyly qamtamasyz etildi.
Aıta keteıik, Almaty qalasy elimiz boıynsha Jol aktıvteriniń sapasy ulttyq ortalyǵy jumysyn bastaǵan alǵashqy qalalardyń biri.
