2022 jyly áleýmettik salaǵa baǵyttalǵan qarajat somasy ósedi – Qarjy mınıstri

NUR-SULTAN. QazAqparat – Bıýdjet shyǵystary qurylymyndaǵy áleýmettik salanyń úlesi 50 paıyz. Bul týraly Úkimet otyrysynda QR Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Shyǵystar orta merzimdi kezeńge Qazaqstan Respýblıkasynyń 2025 jylǵa deıingi jalpyulttyq basymdyqtaryn eskere otyryp, qalyptastyryldy. 2022 jyly shyǵystar bıylǵy jyldyń josparynan 577 mlrd teńgege ulǵaıa otyryp, 15,9 trln teńgeni quraıdy. Bıýdjettiń aǵymdaǵy shyǵystary kelesi jylǵa 14,9 trln teńge deńgeıinde anyqtaldy», - dedi E. Jamaýbaev.

Onyń aıtýynsha, Damý bıýdjetiniń kólemi 2022 jyly 1 trln teńge somasynda josparlanyp otyr.

«Bıýdjettiń áleýmettik baǵyty saqtaldy. Shyǵystar qurylymyndaǵy áleýmettik salanyń úlesi 50 paıyzdy quraıdy. Osylaısha, 2022 jyly áleýmettik salaǵa 2021 jyldyń bıýdjetine qaraǵanda 515 mlrd teńgege óse otyryp, 8 trln teńge kóleminde josparlandy. Shyǵystardyń ósýi jyl saıynǵy ındeksteý jáne zeınetaqy men járdemaqy alýshylar kontıngentiniń ulǵaıýyna, sondaı-aq muǵalim men dáriger jalaqysynyń kóterilýine baılanysty boldy», - dedi mınıstr.

Budan buryn habarlanǵandaı, 2022 jyly túsimder bıyldyń josparymen salystyrǵanda 431 mlrd teńgege ulǵaıa otyryp, 13 trln teńge deńgeıinde boljandy.