2022 jylǵy 1 qańtardan pedofılderge elektrondyq bilezik taǵylady
«Probatsııalyq baqylaýdy damytý úshin elektrondyq bilezikter engizilýde. Bıyl biz bul jumysty ilki joba retinde bastaımyz. Birinshi kezekte 2022 jylǵy 1 qańtardan bastap pedofılderge qatysty qoldanylady», - dedi Erlan Turǵymbaev.
Sonymen qatar ol sybaılas jemqorlyqqa qarsy naqty is-sharalar qabyldanǵanyn aıtty.
«Jemqorlyqty joıý úshin azamattarmen tikeleı baılanys azaıdy. Kólik júrgizý kýáligin berý jáne emtıhan qabyldaý fýnktsııalary «Azamattarǵa arnalǵan úkimet» memlekettik korporatsııasyna berildi. Tirkeý-emtıhan ortalyqtary joıyldy. Polıtsııa qyzmetkerleri kólik quraldarynyń krımınaldyq tarıhyn ǵana tekseredi. Qazaqstanda 30 táýlikke deıin bolatyn shetel azamattaryn tirkeý toqtatyldy. Elektrondyq vızalar engizildi. Tikeleı halyqaralyq áýejaılarǵa kirý vızalaryn berý uıymdastyryldy», - dedi mınıstr.
Erlan Turǵymbaev kóshi-qon salasyndaǵy keıbir qyzmet Eńbek jáne áleýmettik qorǵaý mınıstrligine berilgenin atap ótti.
«Qala syrtyndaǵy «Shep» statsıonarlyq beketteriniń sany 36-dan 6-ǵa deıin qysqardy. Olar tek shekaralas aýdandarda qaldy. Jol qozǵalysyn qadaǵalaý arnaıy baqylaý júıeleri arqyly baılanyssyz ádispen júzege asyrylady. Barlyq patrýldik qyzmetkerler beınetirkegishpen jabdyqtalǵan», - dedi ol.
