2022 jyldyń jeltoqsan aıynda elde jyldyq ınflıatsııa 20,3%-dy qurady - Ulttyq bank

ASTANA. QazAqparat - 2022 jyldyń jeltoqsan aıynda elde jyldyq ınflıatsııa 20,3%-dy qurap (qarashada – 19,6%), jedeldegen. Bul derek QR UB Aqsha-kredıt saıasaty departamentiniń naqty sektor monıtorıngi basqarmasynyń bastyǵy Igor Osıpovtiń 2022 jyldyń jeltoqsan aıyndaǵy QR óńirlerindegi ınflıatsııalyq úrdister týraly túsindirmesinde keltirilgen.

Aımaqtar boıynsha ınflıatsııa 19 óńirde qarqyn alyp, 1 óńirde (Almaty oblysy) baıaýlady.

Jyldyq ınflıatsııanyń eń kóp máni Mańǵystaý oblysynda, Astana qalasynda jáne Aqmola oblysynda tirkeldi.

Jeltoqsanda azyq-túlik taýarlarynyń baǵasy j/j 25,3%-ǵa deıin (qarashada – 24,1%) ósti. Osy toptaǵy taýarlardyń baǵasy Mańǵystaý oblysynda (31,6%) meıilinshe joǵary, al Almaty oblysynda áldeqaıda baıaý ósti (23,6%).

Azyq-túlikke jatpaıtyn taýarlar baǵasynyń ósý qarqyny j/j 19,4%-ǵa deıin jedeldedi (qarashada – 18,6%). Eń joǵary mán Astana qalasynda (30,5%), eń tómengi mán Almaty oblysynda (15,3%) tirkeldi.

Jeltoqsanda aqyly kórsetiletin qyzmetterdiń baǵasy j/j 14,1% deńgeıindegi mánin saqtap qaldy. Bul rette jalpy respýblıkalyq deńgeıden joǵary ósken baǵa Mańǵystaý oblysynda (17,8%), baıaý ósken baǵa Túrkistan oblysynda (11,4%) baıqaldy.

2022 jylǵy jeltoqsanda elde aılyq ınflıatsııa 1,2%-dy qurady, bul sońǵy 5 jylda (2017-2021 jyldary: 0,7%) jeltoqsandaǵy ınflıatsııanyń ortasha máninen birshama joǵary.