2022 jyldan bastap máslıhat hatshylarynyń aılyǵy ósedi

NUR-SULTAN. QazAqparat – Memleket basshysy máslıhat hatshylarynyń jalaqysyn kóterý týraly Úkimettiń usynysyn qoldady. Bul týraly Úkimet basshysy Asqar Mamın Senat ókilderiniń depýtattyq saýalyna bergen jaýabynda aıtty, dep habarlaıdy QazAqparat tilshisi.

«Barlyq deńgeıdegi máslıhat hatshylarynyń, tekserý komıssııalarynyń tóraǵalary men múshelerine eńbekaqy tóleý «Memlekettik bıýdjet esebinen ustalatyn barlyq organdardyń qyzmetkerlerine eńbekaqy tóleýdiń biryńǵaı júıesin bekitý týraly» Úkimettiń 2017 jylǵy 16 qazandaǵy № 646 qaýlysymen retteledi. Memleket basshysynyń memlekettik organdarda eńbekaqy tóleýdiń jańa júıesin engizý jónindegi tapsyrmasyn iske asyrý sheńberinde 2021 jylǵy 30 maýsymda sol qaýlyǵa tıisti ózgerister engizildi», - dep jazady Premer-mınıstr.

Onyń aıtýynsha, barlyq deńgeıdegi máslıhat depýtattarynyń aılyǵy 2022 jyldyń 1 qańtarynan bastap ósýi kerek.

«Barlyq deńgeıdegi máslıhat hatshylarynyń laýazymdyq jalaqysyn kóterýge kelsek, Memleket basshysy 2022 jylǵy 1 qańtardan bastap máslıhat hatshylarynyń jalaqysyn arttyrý týraly Úkimettiń usynysyn qoldaǵanyn habarlaımyn. Osyǵan baılanysty jyl sońyna deıin Úkimet memlekettik bıýdjet esebinen qamtylatyn barlyq qyzmetkerlerdiń eńbekaqysyn reglamentteıtin qaýlyǵa tıisti túzetýler engizý jóninde sharalar qabyldaıdy», - dep túıindedi Asqar Mamın.