2022 jyldan bastap birikken áleýmettik tólem engizilýi múmkin
«Qazirgi ýaqytta Eńbekaqy tóleý qoryna (ETQ) túsetin júkteme nomınaldy mánde 31 paıyzdy quraıdy. Ekonomıkalyq yntymaqtastyq jáne damý uıymy elderinde jáne Qazaqstanda ETQ-ǵa tıimdi júkteme boıynsha júrgizilgen salystyrmaly taldaý Qazaqstandaǵy tıimdi mólsherleme 25,5 paıyzdy quraıtynyn kórsetti. Bul EYDU elderindegi júktemeniń ortasha máninen 10 paıyzǵa tómen», - dedi Úkimet basshysy.
Osy rette Asqar Mamın QR Prezıdentiniń 2019 jylǵy 2 qyrkúıektegi Joldaýyna sáıkes Úkimetke áleýmettik jáne zeınetaqy júıeleriniń turaqtylyǵy arasyndaǵy teńgerimdi qamtamasyz etý, sondaı-aq bıznestiń damýyn yntalandyrýdy saqtaý úshin bıznestiń áleýmettik aýdarymdaryn jınaý kólemi men tetikteri boıynsha shoǵyrlandyrylǵan sheshim ázirleýge tapsyrma berilgenin atap ótti.
«Osy maqsatta 2022 jyldan bastap áleýmettik salyqty, Memlekettik áleýmettik saqtandyrý qoryna, Áleýmettik medıtsınalyq saqtandyrý qoryna jarnalardy jáne jumys berýshilerdiń mindetti zeınetaqy jarnalaryn qamtıtyn birikken áleýmettik tólemdi engizý týraly usynys qaralýda. Jeke tabys salyǵyn jáne mindetti zeınetaqy jarnalaryn esepteýdi jáne tóleýdi ózgerissiz qaldyrý usynylady. Jeke tabys salyǵyn, mindetti zeınetaqy jarnalaryn jáne birikken áleýmettik tólemdi tóleý «Azamattarǵa arnalǵan úkimet» KEAQ-da biryńǵaı tólem qujatymen júrgiziletin bolady. Osylaısha, usynylyp otyrǵan birikken áleýmettik tólemdi engizý ETQ-dan túsetin salyq pen tólemderdi esepteýdi edáýir jeńildetedi. Óıtkeni jarnalardy esepteý kezinde qoldanylatyn ártúrli shegerimder alyp tastalady», - dedi Premer-Mınıstr.
